ОХУ-ын ерөнхийлөгч Владимир Путин Украины асуудлаарх энхийн бага хуралд оролцохгүй гэдгээ Пүрэв гаригт илэрхийлжээ. Путин Швейцарьт зохион байгуулах бага хурлыг даапаалж, Орос ямар ч энхийн хэлэлцээрийг хүлээн зөвшөөрөхгүй гэсэн байна. Тодруулбал, Швейцарийн засгийн газар зургадугаар  сард Украинд энх тайвныг тогтоох дээд хэмжээний бага хурлыг зохион байгуулна гэж мэдэгдсэн. Бага хурлын зорилго нь энхийн үйл явцыг эхлүүлэх боломж, арга замыг хайх явдал гэж Швейцарийн Ерөнхийлөгч Виола Амхерд сэтгүүлчдэд ярьсан ба ОХУ оролцох эсэх нь тодорхойгүй байсан юм.  Путин бага хуралд уригдаагүй гэдгээ мэдэгдсэн ба ОХУ-гүйгээр ямар ч хурал шийдэлд хүрэхгүй гэдгийг хүлээн зөвшөөрөх ёстой гэж үзэж байна.

Путин "Тэд биднийг уриагүй. Түүгээр ч барахгүй тэд бидэнд хийх зүйл байхгүй гэж бодож байгаа. Яг үнэндээ бага хурал бидэнгүйгээр юу ч шийдэх боломжгүй. Ийм гунигтай байгаагүй бол бүх зүйл инээдтэй байх байсан " гэв.

Украины Ерөнхийлөгч Владимир Зеленскийн Москваг цэргээ татаж, Украинд нөхөн төлбөр олгон, олон улсын шүүхэд хандахыг шаардсан энхтайвны томъёоллыг Орос улс няцаасан. Москвад Беларусийн Ерөнхийлөгч Александр Лукашенкотой уулзах үеэрээ Путин "Орос улс хэлэлцээр хийхэд нээлттэй.  Гэхдээ бодит байдалтай ямар ч холбоогүй аливаа схемийг хэзээ ч хүлээн зөвшөөрөхгүй" гэж мэдэгдсэн юм. Путин 2022 оны хоёрдугаар сард Оросын эрх ашгийг хамгаалах, Украиныг НАТО-д элсэх замаар Оросын аюулгүй байдалд томоохон заналхийлэл учруулахгүйн тулд Украин руу цэргээ оруулсан гэж удаа дараа мэдэгдсэн. Киев болон түүний холбоотнууд Оросын цэргийн кампанит ажлыг ямар ч үндэслэлгүй түрэмгийлэл гэж буруутгаж байна.

Эх сурвалж:BBC