ОХУ-ын дайны хүчин чармайлтад Хятад улс технологийн тусламж үзүүлж байгааг АНУ холбоотнууддаа анхааруулжээ. Хоёр улсын цэргийн хамтын ажиллагаа гүнзгийрэхийн хэрээр Хятадаас Орост цэргийн зориулалттай гео сансрын хиймэл дагуулын зураг хуваалцах болсон байна.

Лондонд төвтэй Хатан хааны нэгдсэн үйлчилгээний хүрээлэнгээс өнгөрсөн сард Хятад, Орос хоёр улс 5G технологи болон хиймэл дагуулын технологийн мэдээллээ хуваалцаж, хамтын ажиллагаагаа гүнзгийрүүлэх болсныг анхааруулсан. Энэхүү анхааруулгын дараа АНУ ижил төстэй дээрх мэдэгдлийг хийжээ.

Гео сансрын тагнуулын мэдээлэл нь хиймэл дагуулаас эхлээд хөдөлгөөнт мэдрэгч, газрын хяналтын станц, агаарын зураг зэрэг технологийн сүлжээний өгөгдлүүдийг нэгтгэдэг. Эдгээр өгөгдлийг бодит цагийн газрын зураг, загварчлалыг бүтээхэд ашигладаг аж. Цаашилбал энэ нь цэргийн аюулыг тодорхойлоход тусалдаг гэдгийг Европын холбооны хиймэл дагуулын төвөөс мэдээлжээ.

Хятадын талаас үзүүлж буй тусламжид танк үйлдвэрлэл, оптик, пуужингийн түлш, сансрын хамтын ажиллагаанд зориулсан микроэлектроник болон бусад хэрэглүүрүүд багтах юм.

Хиймэл дагуулын зураг нь Украинд дайтагч талуудын хэн хэнд нь чухал үүрэг гүйцэтгэсэн. Украинд нийлүүлсэн АНУ-ын арилжааны хиймэл дагуулууд бол Оросын хууль ёсны бай гэдгийг Кремль 2022 оны аравдугаар сард мэдэгдэж байв. Элон Маскийн "Starlink" болон "Maxar", "Planet Labs"-ын хиймэл дагуулууд дайны цагт украинчуудад онцгой ач холбогдолтой байжээ.

Эх сурвалж: BUSINESS INSIDER