Цагдаад зодуулж, сүрдүүлэгт өртсөн гэх иргэн цахим хуудаст мэдээлэл нийтэлсэн. Хэрэг өнгөрсөн амралтын өдрийн Бямба гаригт (2024.04.06) болсон байна.

Хохирогчийн өгч байгаа мэдээллээр, Бямба гаригийн 17:30-22:00 цаг хүртэл процесс болсон. Хүүхэдтэй маань тоглоомын талбай дээр муудалцсан 14-15 насны хүүхдүүд маргааныг эхлүүлсэн. Түүнээс болж үл таних этгээдүүд хашаанд байсан машины минь цонхыг хагалж, цагдаад дуудлага мэдээлэл өгсөн. Бүрэлдэхүүн ирж, хэлтэс дээр очиж гомдол гаргаарай гэсэн. Үүний дагуу цагдаагийн хэлтэс ороод цагдаад зодуулсан.

Хэлтэс орж, жижүүртэй уулзах хооронд үл таних хэдэн залуу дагаж орж ирсэн. Нэг нь гэтэл үгийн зөрүүгүй боомилж, "Би цагдаа байна. Чамайг ална" гэхчилэн айлган сүрдүүлсэн.

Улмаар коридороор чирж, камергүй булан хэсэгт очиж биед минь халдаж, цохиж авсан. Удаа ч үгүй миний машины цонхыг хагалсан зарим хүн хамт орж ирж, алаад хаячихъя гэхчилэн биед минь халдсан. Жижүүртэйгээ нийлээд 2-3 цагдаа байсан. Буруу хүнээрээ оролдлоо гэхчилэн хараал хэлж, биед минь халдсан учир би маш их гомдолтой байна гэсэн юм.

ХЭРГИЙГ БҮРТГЭЖ, ШАЛГАЛТЫГ ЭХЛҮҮЛСЭН

Энэ талаар Цагдаагийн ерөнхий газраас тодрууллаа. 

ЦЕГ-аас "Олон нийтийн сүлжээнд нийтлэгдсэн мэдээллийг бүртгэж авсан. Мөн зодуулсан гэх иргэний гомдлын дагуу хэрэг бүртгэл үүсгэсэн.

Цагдаа иргэнийг зодсон гэх хэргийг шалгахад цагдаагийн энгэрийн камерын бичлэг болон бусад баримтаар худал болох нь тогтоогдсон.

Тухайн зодуулсан гэх мэдээллийг хэвлэлд өгсөн иргэнтэй хамааралтай хоёр хэргийг цагдаагийн байгууллага шалгаж байна. Өсвөр насны хүүхдүүдийг зодсон гэх хэрэг. Нөгөө нь цагдаад зодуулсан гэх асуудал. Цагдаад зодуулсан эсэхийг энгэрийн камерын бичлэг бусад баримтаар баталгаажуулахад тус мэдээлэл худал болох нь тогтоогдсон.

Харин ч зодуулсан гэх иргэн өөрөө алба хаагчийн биед халдсан гэх мэдээллийг өглөө.