Нийслэлийн Баянгол дүүргийн 309 дүгээр цэцэрлэгийн багш хүүхдүүдээ зодож байгаа дүрс бичлэг цахим орчинд түгээд буй. Тодруулбал тус цэцэрлэгийн хүүхдүүд эцэг эхдээ багш нар нь загнаж, зоддог гэж хэлж улмаар эцэг эхчүүд камер шүүж баталгаажуулжээ.

Тус цэцэрлэгийн багш хүүхдүүдийг цохих, хүлж уях, хүч хэрэглэх зэрэг зүй бус зохисгүй, багшийн ёс зүй зөрчсөн үйлдэл гаргасан учир цагдаагийн байгууллага шалгахаар болж.

Хүүхдүүдийн эцэг, эхчүүд гомдолтой байгаа бөгөөд хатуу арга хэмжээ авч өгөхийг хүссэн байна.

309 дүгээр цэцэрлэгийн эрхлэгчийн хэлж байгаагаар, багшийг ажлаас чөлөөлж, дахин боловсролын байгууллагад ажиллуулахгүй хатуу арга хэмжээ авна. Нийслэлийн боловсролын газар болон цагдаагийн байгууллагад хандсан байгаа гэсэн юм.

ХҮҮХЭД ЗОДСОН ХЭРЭГ АНХНЫХ БИШ

Өнгөрсөн 2023 оны арванхоёрдугаар сард тус цэцэрлэгийн соробан сампингийн багш нь хүүхдүүдийг зоддог, толгой руу нь цохидог гэх мэдээлэл мөн гарсан. Тиймээс эцэг эхчүүд гомдол гаргаж, хяналтын камерын бичлэгийг шүүснээр тус багш хүүхдүүдийн толгой руу цохих, нүүр рүү нь алгадах зэрэг ёс зүйгүй үйлдэл гаргадгийг илрүүлж байв.

Тухайн үед хэрэг бодитой эсэхийг Боловсролын мэргэжлийн хяналтын хэлтэс, ХГБХХЕГ, ЦЕГ-аас газар дээр нь ажиллаж шалгаж, тогтоосон байдаг.

Энэ удаагийн асуудлыг ч мөн холбогдох албаныхан шалгаж нэмэлт арга хэмжээнүүдийг авах аж.