УИХ-ын гишүүн, Барилга хот байгуулалтын сайдаар ажиллаж байсан З.Баянсэлэнгэ нарын гомдлыг өнөөдөр /2024.04.03/ хэлэлцэх эсэхийг шийдвэрлэн, хяналтын шатны шүүх хуралдаанаар гомдлыг нь хүлээн авахаас татгалзлаа.

Сонгинохайрхан дүүргийн Эрүүгийн хэргийн анхан шатны шүүхийн 2023 оны есдүгээр сарын 28-ны өдрийн 1157 дугаар цагаатгах тогтоол, нийслэлийн Эрүүгийн хэргийн давж заалдах шатны шүүхийн 2024 оны нэгдүгээр сарын 17-ны өдрийн 103 дугаар магадлалтай, З.Баянсэлэнгэ, М.Болортуяа, Ж.Бурмаа нарт холбогдох хэргийг шүүгдэгч Ж.Бурмаагийн өмгөөлөгч Ж.Баяржавхлан, шүүгдэгч З.Баянсэлэнгэ нарын гаргасан гомдлыг үндэслэн хянан хэлэлцэх эсэхийг хэлэлцсэн юм.

Өмнө нь энэ хэргийг нийслэлийн Сонгинохайрхан дүүргийн эрүүгийн хэргийн анхан шатны шүүх цагаатган шийдвэрлэж байв. Прокуророос илт үндэслэлгүйгээр хэргийг хэрэгсэхгүй болгосон нь гэж үзэн эсэргүүцэл бичсэн. Нийслэлийн эрүүгийн хэргийн давж заалдах шатны шүүх 2024 оны нэгдүгээр сарын 17-нд хянан хэлэлцээд прокурорын эсэргүүцлийг хүлээн авч, анхан шатны шүүхийн шийдвэрийг хүчингүй болгож, хэргийг дахин хэлэлцүүлэхээр болсон. Барилга хот байгуулалтын сайд асан З.Баянсэлэнгэ, тус яамны хэлтсийн даргаар ажиллаж байсан Ж.Бурмаа, Газрын даргаар ажиллаж байсан М.Болортуяа нарыг бүлэглэн, албан тушаалын байдлаа урвуулан ашиглаж, улсын төсөвт 14,993,676,800 төгрөгийн хохирол учруулсан гэдэг мэдээллийг хуулийн байгууллагаас өгч байв.