Цахим спортын "CS2" төрлийн "ESL Challenger – Jönköping 2024″ тэмцээний Азийн бүсийн хаалттай сонгон шалгаруулалт өчигдөр/2024.04.02/ эхэллээ. Нийт дөрвөн баг ганц эрхийн төлөө өрсөлдөж байгаа бөгөөд Монголоос "The MongolZ" болон "ATOX" багууд оролцож байна. 

Тэмцээний эхний өдөр "The MongolZ" баг орос тамирчдаас бүрдсэн "LYG" багийн эсрэг тоглон 1-2 гэсэн харьцаатай ялагдал хүлээв. Угтаа эхний тоглолтод илт давуу илүүрхсэн ч хоёр болон гурав дахь тоглолтод дараалан хожигджээ. Тоглолтын дараа "The MongolZ"-ийн зүгээс "LYG" багийг булхайцсан, луйвардсан гэж үзэв. "The MongolZ"-ийн хөгжөөн дэмжигчид ч үүнийг нь нотлох дүрс бичлэгийг байршуулжээ.

"CS2"-ийн онлайн тэмцээнүүдэд баг тамирчид булхайцах тохиолдлууд цөөнгүй бий. Тухайлбал, өрсөлдөгч багаа хана нэвтэлж хаана явж байгааг нь харах, буудсан сум бүр нь өрсөлдөгчийнхөө толгойд тусах зэрэг олон бохир арга бий.

Харин "ATOX" баг Хятадын "LVG" баг 0-2 гэсэн харьцаатай хожигдов. "ATOX"-ийн хувьд саяхан бүрэлдэхүүндээ өөрчлөлт оруулан "ANNIHILATION"-ийг нэгтгэсэн билээ.

Ийнхүү хоёр хожигдсон баг учраа тааран тоглоход "The MongolZ" 2-0 гэсэн харьцаатай хожжээ. Тэд өнөөдөр 16:30 цагаас "LYG" багтай дахин тоглоно. "LYG" өчигдөр дээд бүсийн финалд "LVG" багт 0-2 гэсэн харьцаатай хожигджээ.

100 мянган ам.долларын шагналын сантай "ESL Challenger – Jönköping 2024″ тэмцээн ирэх зургадугаар сард Швед улсад болно. Одоогоор "Falcons", "Complexity Gaming", "ENCE", "Alliance" зэрэг багууд эрхээ аваад байна.