УИХ-ын Нийгмийн бодлогын байнгын хорооны өнөөдрийн /2024.04.02/ хуралдааны үеэр УИХ-ын гишүүн Т.Аубакир  ажил хийх гэхээр хөгшдөөд, тэтгэвэрт гарах болохоор залуудаад байгаа завсрын хүмүүсээ яах вэ гэдэг асуудал хөндлөө.

Энэ тухай тэрбээр “Би танай байнгын хороонд харьяалагддаггүй ч, асуудал нь хамаарах тул асууж байна. Тэтгэврийн насанд хүрээгүй завсрын хүмүүс байна. Тэтгэвэрт гаръя гэхээр “Чи залуу байна, болоогүй байна” гэдэг. Ажилд оръё гэхээр “хөгшдөөд байна” гэдэг. Гарт нь хүүхэд байхгүй, хүүхдийн мөнгө байхгүй, хашаанд нь мал байхгүй орлого байхгүй.

Утсаар ч холбогдож хэлж байна, уулзахад ч  хэлж байна. Эдгээр улсыг өөрсдөө учраа ол гээд хаях юм уу. Хаях гэж байгаа бол тэрийгээ хэл. Ямар их айхтар инээж байх юм” гэв.

Дээрх асуултыг тавих үед тус байнгын хорооны хуралдаанд оролцож байсан гишүүд инээлдсэнд Т.Аубакир  гишүүн эгдүүцэж, “инээгээд байх асуудал биш шүү” гэдгийг ч сануулаад авсан.

УИХ-ын Нийгмийн бодлогын байнгын хорооны дарга П.Анужин “Чухал асуудал ярьж байгаа хэдий ч таны асуултад хариулах боломжгүй. Танай байнгын хороо хэлэлцэх асуудалтайгаа холбоогүй зүйлийг иргэдийн асуудал гээд ярьдаг эсэхийг мэдэхгүй юм. Нийгмийн бодлогын байнгын хороо  хэлэлцэх асуудлаа горимын дагуу хэлэлцдэг” гэв.

Хөдөлмөр нийгмийн хамгааллын сайд Х.Булгантуяа “Халамжийн тухай хуулд зааснаар тэтгэврийн насанд хүрсэн бол халамжийн тэтгэвэр авна. Түүнээс  хөдөлмөрийн насны хүн болгоныг халамжид хамруулах хэцүү.  Аль болохооор халамжийг бууруулж, хөдөлмөр эрхлэлтийг дэмжих бодлого барьж байгаа” гэсэн хариулт өгөв.

Г.ХОРОЛ