Баянзүрх дүүргийн 26 дугаар хорооны нутаг дэвсгэрт өнгөрсөн нэгдүгээр сарын 24-ний 01:00 цагийн орчимд гарсан газын дэлбэрэлтийн улмаас олон хүн нас барж, 10 гаруй хүн түлэгдэж, 100 орчим айл эд хөрөнгөөрөө хохироод буй. Тэгвэл тус ослын нэгдсэн дүгнэлт өнөөдөр /2024.04.01/ гарна гэдгийг албаныхан хэлж байв.

Ослын шалтгаан нөхцөлийг тодруулахаар цагдаа, прокурор ажиллаж байгаа бол хохирлын үнэлгээг гаргахаар тусгай баг ажилласан байна. Одоогоор ослын эцсийн дүгнэлт аль аль байгууллагад ирээгүй байна гэлээ.

Цагдаагийн ерөнхий газар, Прокурорын байгууллага, Онцгой байдлын ерөнхий газар болон ослын улмаас хохирсон иргэдэд хууль зүйн тусламж үзүүлж буй өмгөөлөгчөөс тодруулахад өнөөдөр нэгдсэн дүгнэлт гарах ёстой ч ирээгүй байна гэсэн юм.

Өнөөдрийг хүртэлх хугацаанд ослын газар нийт найман төрлийн үзлэг, хэмжилтийг хийжээ. Тухайлбал, галд Дүнжингаравын уулзварт байрлах таван обьект өртсөн. Эдгээрийн нарийвчлалтай дүгнэлт өнөөдөр гарах юм байна. Мөн нийт хохирлын хэмжээ, сэргээн засварлах зардлыг Барилга хөгжлийн төвөөс гаргана гэв.

Эргэн сануулахад, тус ослын газрын үзлэгийг 189 мөрдөгчийн бүрэлдэхүүнтэй зохион байгуулсан. Ослын нөхцөл байдлыг шинжээчдийн бүрэлдэхүүн тогтооно. Дүгнэлт 14-60 хоногт гарна гэдгийг Цагдаагийн ерөнхий газраас мэдээлсэн. Ослын улмаас учирсан хохирол, түүнийг засварлах зардлын хэмжээний нэгдсэн дүгнэлт ирэх Баасан гаригт гарах юм байна.