Өнгөрсөн долоо хоногийн баасан гаригийн /2024.03.22/-ний өдрийн УИХ-ын нэгдсэн чуулганаар  Гаалийн албан татвараас чөлөөлөх тухай хуулийн төслийг хэлэлцэх үеэр УИХ дахь МАН-ын бүлгийн дарга, УИХ-ын гишүүн Д.Тогтохсүрэн уг хуулийн төсөлтэй холбоотой асуудлаар гишүүд өөр өөр байр суурь илэрхийлсэн. Тиймээс МАН-ын бүлэг гишүүдийнхээ байр суурийг нэгтгэх үүднээс Гаалийн албан татвараас чөлөөлөх хуулийн төсөл дээр ажлын таван өдрийн завсарлага авах хүсэлт гаргасан юм.  Харин өнгөрсөн даваа гаригт /2024.03.25/-нд болсон МАН-ын бүлгийн хуралдаанаас гарсан шийдвэрийг танилцуулах үеэр УИХ дахь МАН-ын гишүүд уг хуулийн төслийг дэмжих тал дээр нэгдмэл байр суурьтай болсон хэмээн мэдэгдсэн юм. МАН-ын бүлгээс авсан 5 хоногийн завсарлагын хугацаа өнөөдөр дуусгавар болсон тул Гаалийн албан татвараас чөлөөлөх тухай хуулийн төслийг өнөөдөр хэлэлцэх юм.

Түүнчлэн Өнгөрсөн долоо хоногийн баасан гаригийн /2024.03.22/-ний өдрийн УИХ-ын нэгдсэн чуулганаар УИХ-ын гишүүн Ц.Мөнх-Оргил нарын гишүүний өргөн барьсан Монгол Улсын Үндсэн хуулийн цэцийн тухай хуулийн шинэчилсэн найруулгын төсөл болон Үндсэн хуулийн цэц маргаан хянан шийдвэрлэх тухай хуулийн шинэчилсэн найруулгын төслийг хэлэлцсэн.Тэгвэл УИХ дахь АН-ын бүлгийн дарга О.Цогтгэрэлийн гаргасан горимын саналын дагуу энэ асуудлаар ажлын 5 хоногийн завсарлага авсан юм.  УИХ дахь Ардчилсан намын бүлэг  өнгөрсөн даваа гаригт /2024.03.25/-нд бүлгийн хуралдаанаа хийсэн боловч мэдээлэл хийгээгүй. Хэдий тийм боловч завсарлага авсан хуулийн төслийн талаар нэгдмэл байр суурьтай болсон гэх мэдээллэл байгаа юм. Ямартай ч УИХ дахь Ардчилсан намаас авсан ажлын 5 хоногийн завсарлагааны хугацаа өнөөдрөөр дуусгавар болж байна. Тиймээс Монгол Улсын Үндсэн хуулийн цэцийн тухай хуулийн шинэчилсэн найруулгын төсөл болон Үндсэн хуулийн цэц маргаан хянан шийдвэрлэх тухай хуулийн шинэчилсэн найруулгын төслийг УИХ-ын өнөөдрийн чуулганаар хэлэлцэх юм.

Өнөөдөр /2024.03.29/-ний УИХ чуулган хуралдана. Өнөөдрийн хуралдаанаар

 Гаалийн албан татвараас чөлөөлөх тухай хуулийн төсөл /Засгийн газар 2024.03.18-ны өдөр өргөн мэдүүлсэн, хэлэлцэх эсэх, үргэлжилнэ/

• Банкны тухай хуульд нэмэлт, өөрчлөлт оруулах тухай хуулийг дагаж мөрдөх журмын тухай хуульд өөрчлөлт оруулах тухай хуулийн төсөл /УИХ-ын гишүүн Б.Баттөмөр 2024.02.07-ны өдөр өргөн мэдүүлсэн, хэлэлцэх эсэх/
• Үнэт цаасны зах зээлийн тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2023.12.22-ны өдөр өргөн мэдүүлсэн, анхны хэлэлцүүлэг/
• Мэргэжлийн нэгдсэн холбооны эрх зүйн байдлын тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Н.Учрал 2019.02.20-ны өдөр өргөн мэдүүлсэн, анхны хэлэлцүүлэг/
•   “Төрийн болон орон нутгийн өмчит хуулийн этгээдийг шинээр байгуулахыг түр хориглох, тэдгээрийн үр ашиг, менежментийг сайжруулах тухай”,“Аж ахуйн үйл ажиллагаанд оролцох төрийн оролцоог хязгаарлах тухай” Улсын Их Хурлын тогтоолын нэгтгэсэн төсөл /УИХ-ын гишүүн Д.Цогтбаатар нарын 12 гишүүн 2022.06.03-ны өдөр, УИХ-ын гишүүн О.Цогтгэрэл 2022.12.13-ны өдөр тус тус өргөн мэдүүлсэн, эцсийн хэлэлцүүлэг/
•  Монгол Улсын Үндсэн хуулийн цэцийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Ц.Мөнх-Оргил нарын 2 гишүүн 2024.03.04-ний өдөр өргөн мэдүүлсэн, хэлэлцэх эсэх, үргэлжилнэ/
• Үндсэн хуулийн цэцэд маргаан хянан шийдвэрлэх тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Ц.Мөнх-Оргил нарын 2 гишүүн 2024.03.04-ний өдөр өргөн мэдүүлсэн, хэлэлцэх эсэх, үргэлжилнэ/
•    Монгол Улсын Ерөнхий сайдын мэдээлэл:Эдийн засгийн хамтын ажиллагаа, хөгжлийн байгууллагаас зохион байгуулдаг Суралцагчийн сурлагын амжилтыг үнэлэх олон улсын “PISA-2022” үнэлгээний Монгол Улсын үр дүн, бодлогын зөвлөмжийн талаар хэлэлцэх юм.