Нийслэлийн Сонгинохайрхан дүүргийн 32 дугаар хорооны иргэдийн хувьд нэн яаралтай шийдвэрлүүлэх асуудал нь нь авто зам болж хувирчээ. Улаанбаатар хотод орж ирэхийн тулд оршин суугчид Шанд-Хурган чиглэлийн автобусаар зорчдог ч шаварт сууснаас зорчих тээврийн хэрэгсэлгүй болсон байна.  Дээрх чиглэлд өдөр бүр гурван автобус 30 минутын зайтай нийтийн тээврийн үйлчилгээнд явдаг ч шаварт суугаад буй нь энэ аж.

Оршин суугчийн тайлбарлаж байгаагаар 2.6 км авто зам тавьж, Эмээлт чиглэлийн авто замтай холбоход тээврийн хэрэгсэл шаварт суух асуудал гарахгүй. Дээрх 2.6 км авто замыг 2019 оноос эхлэн барихаар зураг төслийг гаргасан гэдэг ч шийдэгдэлгүй өнөөдрийг хүргэжээ. Энэ талаар тэнд оршин суудаг иргэн мэдээлэл өгөхдөө "Өнөөдрөөс шавартай зам дээр дайрга асгаад янзалж байна. Энэ хэсэгт зам тавих нэрээр жалга шиг ухаад хаячихсан учраас сургуулийн хүүхдүүд Эмээлтээс Таван шар руу сургуульд явахад маш хүндрэлтэй байна. Бас энэ хавьд 960 хүүхдийн багтаамжтай сургууль барьж, 95 гүйцэтгэлтэй байгаа ч цар тахлаас хойш одоог хүртэл ашиглалтад ороогүй байна" гэсэн юм.

Иймээс энэ асуудлыг холбогдох байгууллагууд анхааралдаа авч авто замыг барьж өгөхийг хүсч байна. Сануулахад, Сонгинохайрхан дүүргийн 32 дугаар хороо нь 759 өрхийн 2700 гаруй иргэн амьдардаг. Зүүн хэсгээрээ 22-ын товчоо болон, 20 дугаар хороо, урд талаараа Сонгинохайрхан уулаар, зүүн урдуураа Төв аймгийн Алтан булаг сумын Хустайн нуруу, Хурганы сангийн аж ахуйн баруун талаар Төв аймгийн Баянцогт сумын Хүй долоон худаг, хойгуураа Сонгинохайрхан дүүргийн 21-р хороо, зүүн хойд талаараа 22-р хороо Тахилтын хэсэгтэй холбогддог байна.