Монголын сагсан бөмбөгийн холбооны зүгээс өчигдөр/2024.03.27/ Эрдэнэтийн Уурхайчид багт шаардлага хүргүүлжээ. Тус шаардлагад Уурхайчид багийг FIBA буюу Олон улсын сагсан бөмбөгийн холбоотой үүсгэсэн асуудлаа нэн даруй шийдвэрлэхийг сануулж, эс бөгөөс ирэх улирал лигт оролцуулахгүй гэсэн аж.

Тэгвэл өнөөдөр Уурхайчид багийн зүгээс хариу мэдэгдэл хийн FIBA-тай ямар асуудал үүсгэн, хоригт орсон талаараа мэдээлжээ. Тус багийн тухайд Сербид бэлтгэл хийх үеэрээ Кори Маниголт гэх тоглогчтой гэрээ байгуулсан ч тухайн тоглогч нь хар тамхи, эрүүл мэндийн шинжилгээнд оролцохоос татгалзаж, мөн зан авирын асуудалтай байсан тул гэрээг нь цуцалсан гэнэ. Харамсалтай нь, тоглогч болон түүний агент гэрээний мөнгөө бүтэн нэхэмжилж, FIBA-д хандсанаар дээрх асуудал үүсчээ.

FIBA-ийн зүгээс Монголын сагсан бөмбөгийн холбоог 15 мянган франкаар торгожээ.

Уурхайчидын зүгээс Кори Маниголт болон түүний агенттай холбогдсон ч өндөр хэмжээний мөнгөн дүн нэхэмжилж, тохиролцоонд хүрэхэд хэцүү байгаа гэдгээ мэдэгдлээ.

Герман, Кипр, Болгарын лигт тоглож байсан 25 настай Кори Маниголт нь Киприйн нийслэл Никосиа хотын төвд байрлах шөнийн цэнгээний газрын гадаа 46 настай нэгэн эрэгтэйд зодуулж, эмнэлэгт хүргэгдэж байжээ.