“Цавчаа ногоон” автобусны худалдан авалтыг хянан шалгах Түр хороо ирэх дөрөвдүгээр сард багтаан нээлттэй сонсгол зохион байгуулахаар төлөвлөж байна. Түр хорооны зүгээс одоогоор дээрх сонсголыг зохион байгуулах бэлтгэл хангах хүрээнд таван  хянан шалгагч, шинжээч томилжээ.

“Цавчаа ногоо”-ны асуудлаас болж, УИХ-ын гишүүн Ж.Сүхбаатар Түгжрэлтэй тэмцэх сайдын албанаасаа чөлөөлөгдсөн бол Улаанбаатар хотын захирагчаар ажиллаж байсан Д.Сумъяабазар мөн “огцорсон”.

УИХ-ын гишүүн Ж.Сүхбаатарын хувьд “Автобус худалдан авахад миний оролцоо байгаагүй. Төсвийг нь шийдэж өгсөн. Худалдан авах ажиллагааг нийслэл зохион байгуулсан” гэж мэдэгдсэн. Харин Улаанбаатар хотын захирагч асан Д.Сумъяабазар мөн л өөрт нь хамааралгүйгээр энэ ажил явсан гэдэг агуулгатай тайлбар хийсэн.

Авлигатай тэмцэх газар энэ хэргийг шалгаад “Тэнүүн огоо” компанийн захирал А.Ганхуяг, Нийслэлийн Худалдан авах ажиллагааны газрын дарга асан Г.Энхтайван нарын хүмүүсийг саатуулан шалгаж буй.

“Тэнүүн огоо” компанийн захирал А.Ганхуяг нийтийн тээврийн парк шинэчлэлтэд зориулж 100 автобус импортоор оруулж ирсэн ч тэр нь Вьетнамд угсарсан автобус болох нь шалгалтаар батлагдсан.  Үүнээс болж, 130 гаруй тэрбум төгрөгийн хохирол учирсан гэж үздэг.

А.Ганхуягийн зүгээс шоронгоос захидал бичихдээ энэ асуудалд улстөрчид хамаагүй, бараг нэр холбоод байгаа хүмүүсийг танихгүй гэх агуулгатай зүйл бичсэн. Харин Улаанбаатар хотын захирагч Х.Нямбаатар энэхүү албанд томилогдсоныхоо дараахан “Нийтийн тээврийн салбар мафижсан” гэж мэдэгдсэн юм.

Иймээс нийтийн тээврийн салбар мажижсан байсныг мэдсэн хэрнээ “но”-той автобус худалдан авахыг нь зөвшөөрсөн үү, эсвэл хурган дарга нар том дарга нараасаа илүү эрх мэдэл эдэлж, худалдан авалт хийн цавчаа хийдэг үү. Энэ асуултын хариултыг олоход экс сайд Ж.Сүхбаатар, Улаанбаатар хотын захирагч асан Д.Сумъяабазар нарын гэрчийн мэдүүлгийг сонсох нь чухал гэж үзэж буй юм.

Г.ХОРОЛ