Монголын хөлбөмбөгийн үндэсний шигшээ баг 2024 оны эхний цугларалтаа гуравдугаар сарын 18-26-ны хооронд болох Олон улсын хөлбөмбөгийн холбооны шигшээ багуудын өдрийн хүрээнд Азербайжан улсын Баку хотод хийв. "FIFA Series" албан ёсны нөхөрсөг эхний тоглолтоо Монголын шигшээ баг талбайн эзэн Азербайжаны шигшээ багийн эсрэг хийсэн.

Азербайжаны шигшээ баг Европ тивийн баг гэдгээ тоглолтын эхнээс харуулж довтолгооны хөлбөмбөг үзүүлж байсан ч Монголын шигшээн хамгаалалт нягт, шигүү байлаа. Харамсалтай нь, тоглолтын төгсгөлд чөлөөт цохилтоос ирсэн бөмбөгийг Бахлул Мустафазаде гоол оруулж, үндсэн цаг 1:0 гэсэн харьцаатай өндөрлөсөн.

Дараагийн тоглолтоо Африк тивийн төлөөлөл Танзани улсын эсрэг хийсэн. Монголын шигшээ баг тоглолтын эхэнд шахалт хийж эхлүүлж хэд хэдэн боломжийг үүсгэн хамгаалалтдаа илүү нягт байж эхний үед гоол оролгүй 0:0 харьцаатай дуусгав. Харин хоёрдугаар үед Танзанийн шигшээ баг өөрсдийн хурдтай хүчтэй олон талт тоглолтоо үзүүлж, үндсэн цагт 3:0 харьцаатай хожил байгууллаа.