Гишүүнчлэлийн асуудлын тухайд спорт холбоодын шинэ тэргүүн нар МҮОХ-ны гишүүнээр бүртгүүлжээ. Тухайлбал, чөлөөт бөхийн холбооны өмнөх ерөнхийлөгч Х.Бадамсүрэн, ерөнхий нарийн бичгийн дарга Б.Батбаяр нарыг чөлөөлж, тэдний оронд Я.Содбаатар, П.Гансүх нарыг, Монголын үндэсний допингийн эсрэг байгууллагын өмнөх ерөнхийлөгч Ж.Хатанбаатарыг чөлөөлж, шинэ тэргүүн Ц.Уугангэрэлийг, Монголын шатрын холбооны өмнөх ерөнхийлөгч Э.Гурванбаатарыг чөлөөлж, С.Наранбатыг гишүүнээр тус тус бүртгэжээ.

МҮОХ-ны 2023 оны санхүүгийн тайланд хараат бус аудитын шалгалтыг "Их Наяд Аудит" ХХК анхны удаагаа санхүүгийн балансын аудитын тайлан хийсэн гэнэ. Тайланг нь гуравдугаар сарын 14-ний өдөр гаргажээ.

Орлогын тухайд нийт 2,462,096,000 төгрөг олон улсын байгууллага, хөтөлбөр, түнш байгууллагуудаас орж иржээ. Тодруулбал, түнш байгууллагуудаас 722,456,000 төгрөг, гишүүнчлэлийн татвар 21,600,000 төгрөг, байрны түрээс 60,000,000 төгрөг, Олон улсын олимпийн хорооны эв санааны нэгдлээс хэрэгжүүлэх хөтөлбөрүүд 322 мянган ам.доллар буюу 1,085,140,000 төгрөг, Азийн олимпийн зөвлөл 45 мянган ам.доллар буюу 151,650,000 төгрөг, Олон улсын олимпийн хороо 125 мянган ам.доллар буюу 421,250,000 төгрөг тус тус олжээ.

Мөн "361 брэнд" 3 тэрбум 425 сая төгрөгийн бэлэн бус дэмжлэг буюу баг, тамирчдын хувцас, "Ханбогд Кашмер" ХХК 256 сая төгрөгийн баг тамирчдын хувцас, "Келме" брэнд 127 сая төгрөгийн баг тамирчдын хувцасны дэмжлэг үзүүлжээ.

Өнгөрсөн онд Монголд "Улаанбаатар 2023" зүүн Азийн залуучуудын наадам болсон. Үүний хүрээнд нийт 333,142,500 төгрөгийн дэмжлэгийг 12 спорт холбоодод үзүүлжээ. Хөлбөмбөгийн холбоо хамгийн өндөр дэмжлэгийг буюу 63 сая төгрөгийг авсан бол тэдний араас волейболын холбоо 44,077,000 төгрөг, сагсан бөмбөгийн холбоо 42,014,000 төгрөг, хөнгөн атлетикийн холбоо 37,754,500 төгрөг тус тус авчээ.

Тэгвэл "Ханжоу 2022" Азийн наадмын хүрээнд нийт 1,541,389,500 төгрөгийн дэмжлэг холбоодод үзүүлсэн аж. Хөлбөмбөгийн холбоо нийт 130,645,000 төгрөгийн дэмжлэг авсан бол усан спортын холбоо 91,111,000 төгрөг, сагсан бөмбөгийн холбоо 75,115,000 төгрөг, волейболын холбоо 73,553,000 төгрөгийн дэмжлэг тус тус авчээ.

2018 оноос эхлэн Парисын олимп болон паралимпийн наадмын бэлтгэл ажлыг хангажээ. 2018 онд бэлтгэл ажлын төсөв 5 тэрбум 31 сая байсан бол 2024 онд 25 тэрбум 600 саяыг төсөвлөжээ. Мөн нэг тамирчинд жил зарцуулсан зардал 2018 онд 31-32 сая төгрөг байсан бол 2024 онд 83-84 сая төгрөг зарцуулах аж.