УИХ-ын 2024 оны 13 дугаар тогтоолоор байгуулагдсан Нийслэлийн нийтийн тээврийн чанар, хүртээмжийг нэмэгдүүлэх, парк шинэчлэх шаардлагын дагуу 2023 онд худалдан авсан автобусны худалдан авах ажиллагаанд хяналт шалгалт хийх үүрэг бүхий УИХ-ын хянан шалгах түр хороо байгуулагдсан. Тус түр хороонд УИХ-ын гишүүн  П.Анужин, Д.Батлут, Ж.Бат-Эрдэнэ, Х.Ганхуяг, Ц.Даваасүрэн, Г.Тэмүүлэн, Ж.Чинбүрэн, Ж.Батсуурь, Н.Ганибал, С.Одонтуяа, Т.Доржханд нар тус хянан шалгах түр хорооны бүрэлдэхүүнд ажиллаж байгаа юм. Тэгвэл өнгөрсөн долоо хоногт тус түр хороо хуралдаж, хуралдаанд оролцсон гишүүдийн 87.5 хувийн саналаар УИХ-ын гишүүн Ж.Бат-Эрдэнийг даргаараа томилоод байгаа юм.

Хянан шалгах түр хороо нийслэлийн нийтийн тээврийн парк шинэчлэлийн хүрээнд 2023 оны худалдан авах ажиллагааг шуурхай зохион байгуулсан үндэслэл, шалтгааныг тодруулан шалгахын зэрэгцээ төрийн нууцад хамааруулсан шалтгаан, төрийн болон албаны нууцаас гаргах шаардлагатай байсан эсэхийг тогтоох юм.

Түүнчлэн Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 35 дугаар зүйлд заасан “гэрээ шууд байгуулах арга”-аар хийсэн нь үндэслэлтэй эсэхийг тодруулах, үүний зэрэгцээ холбогдох хууль тогтоомжийг өөрчлөх шаардлага бий эсэхийг нягтлахыг зорьж ажиллана гэдгээ түр хорооны гишүүд илэрхийлж байсан юм. Тэгвэл 2023 онд худалдан авсан автобусны худалдан авалтыг ажиллагаанд хяналт шалгалт хийх шинжээчийг тус түр хорооны өнөөдрийн хуралдаанаар томилох юм байна.

УИХ-ын 2024 оны сонгууль хаяна ирсэн энэ үед авлига, хээл хахууль, албан тушаалын гэмт хэрэгт холбогдож, хулгай луйвар хийсэн хүмүүст хариуцлага тооцож чадах эсэхийг харуулах бас нэгэн сонсгол хийгдэхээр хүлээгдэж байгаа нь автобусны худалдан авалттай холбоотой асуудал юм.

"Ногоон" автобусны сонсголын дөрөвдүгээр сард багтааж хийхийг зорьж байгаа гэдгийг тус түр хорооны дарга удаа дараа мэдэгдсэн. Хэлсэн хугацаандаа нийтийн сонсгол зохион байгуулж чадах эсэх нь өнөөдөр шинжээчээ томилж чадах эсэхээс ихээхэн хамаарах юм.