Үндэсний аудитын газарт 13:00 цагийн байдлаар улс төрийн 17 нам, эвсэл мөрийн хөтөлбөрөө хүргүүлээд байна. Үүний нэг нь Үндэсний эвсэл юм. Тэгвэл Үндэсний эвслийн тэргүүн Н.Номтойбаяр мөрийн хөтөлбөрөө хүргүүлэх үедээ “Эдийн засаг, нийгмийн уялдаа холбоог эмээлийн хоёр бүүрэг рүүгээ холбож өгсөн. Үүний үр дүнд төрийн бодлогын алдааг засч залруулна. Манай эвслээс өргөн боловсруулсан мөрийн хөтөлбөрийг мэргэжлийн, мэргэшсэн хүмүүс боловсруулсан.

Өөрөөр хэлбэл, мөрийн хөтөлбөр боловсруулах үйл ажиллагаанд улстөрчид тэр тусмаа миний бие гар хүрээгүй. Улстөрч хүн мэргэжлийн хүмүүс өөр өөрсдийнхөө салбарт тулгамдаж байгаа асуудлыг төрийн бодлого болгож боловсруулахад үүд хаалгыг нь нээж өгөх ёстой. Бид “Нэг улстөрч мянган мэргэжилтэн” зарчмыг баримтлан ажиллаж байна.

Төрийн бодлого шийдвэрийг төдийлэн сайн мэргэшээгүй улстөрчид гаргаж ирсэн нь уг бодлого шийдвэр бодит хөрсөн дээрээ буухгүй хэрэгждэггүй нь эргээд нийгэм, эдийн засгийг хямралт нөхцөл байдалд оруулж байна. Тиймээс энэ алдааг засч мэргэжлийн хүмүүсийн дуу хоолой, бодлого шийдвэрийг төрд оруулахыг зорьж байна. Миний хувьд “Нэг улстөрч мянган мэргэжилтэн” бодлогынхоо хэрэгжилтийг хангах үүднээс намын жагсаалтаа ахалж, мэргэжлийн хүмүүсийг төрийн бодлого шийдвэр гаргахад үүрэг оролцоог нь нээж өгөх үүрэг хүлээж байна.

Энэ удаагийн сонгууль бүсчилсэн тойргоор явах учраас мөнгөтэй хүмүүс сонгуульд нэр дэвших бололцоотой болж байгаа нь гашуун үнэн. Цаг хугацааны хувьд сонгуулийн сурталчилгаа 17 хоног болох учраас тухайлбал, Ховд, Увс, Завхан, Говь-Алтай аймгийн тойргийг аваад үзэхэд газар нутаг том, зардал их гарна. Энэ нь шинэ улс төрийн нам, шинэ залуу нэр дэвшигчдэд бололж нөхцлийн хувьд хэцүүхэн тусч байна.

Хэдий тийм боловч том зургаар нь авч үзвэл бүсчилсэн тойрог, бүсчилсэн хөгжил гэдэг бол зөв зүйтэй алхам юм. Тиймээс цаашид сонгуулийн сурталчилгаа хийх, олонд танигдах хууль эрх зүй, цаг хугцааны боломжийг харгалзан үзэх ёстой. Мөрийн хөтөлбөрөө хууль тогтоомжийн дагуу хэд хэдэн бодлогод нийцүүлэх ёстой. Тухайлбал, “Алсын хараа-2050” бол монголын төрд зайлшгүй байх ёстой бодлого. Санаа нь зөв. Гэхдээ үүнийг боловсруулахдаа бодлогын ноцтой алдаа гаргасан байсан нь илтэд ажиглагдсан. Тиймээс алдаатай бодлогодоо нийцүүлж мөрийн хөтөлбөрөө бооловсруулах шаардлага тавьж байгаа нь бас нэг алдаа. Тиймээс бид цаашид “Алсын хараа-2050” бодлогыг шинэчлэхэд мэргэжлийн хүмүүсээс бүрдсэн бүрэлдэхүүн гаргаж шинэчлэл, тодотгол хийх зайлшгүй шаардлагатай байна” гэдгийг онцоллоо.