Өнгөрч буй долоо хоногт болж өрнөсөн онцлох үйл явдлуудыг хураангуйлан хүргэж байна. 

МЕТРОНЫ ТЕНДЕРТ НЭР ХҮНДТЭЙ 20 КОМПАНИ САНАЛАА ИРҮҮЛЛЭЭ

Улаанбаатар хотын захирагч Х.Нямбаатар Даваа гаригт /2024.03.18/ мэдээлэл хийлээ. Тэрбээр “Нийслэл Улаанбаатар хотоос метроны бүтээн байгуулалтын ажлыг эхлүүлэх шийдвэрийг гаргаж, өнгөрсөн хоёрдугаар сард Нийслэлийн иргэдийн төлөөлөгчдийн хуралдаанаас метроны төсөвт өртгийг баталж өгсөн. Хоёр үе шаттай тендерийн сонгон шалгаруулалт хийхээр төлөвлөсөн. Нэгдүгээр үе шат нь мөн хоёр үе шаттай. Эхний удаад зөвлөх үйлчилгээний баг сонгон шалгаруулах тендер зарласан. Нэгдүгээр үе шат өнөөдрөөр дуусгавар болж байна. Төслийн зөвлөх үйлчилгээний багийн тендерт оролцохоо илэрхийлж 11 улсын 20 компани Улаанбаатар метроны төсөлд оролцох сонирхлоо илэрхийлж, бичиг баримтаа ирүүллээ" гэв.

Дэлгэрэнгүйг энд дарж уншина уу.

"THE MONGOLZ" ТҮҮХ БҮТЭЭЖ, АЗИЙН ЧАНСААГ АХИУЛЛАА

Цахим спортын "CS2"-ийн анхны Мэйжор тэмцээн Дани Копенхаген хотноо үргэлжилж байна. Лхагва гаригт /2024.03.20/ Ази, Номхон далайн бүсийн цор ганц төлөөлөл болоод буй Монголын “The MongolZ” баг Бразилын “Legacy” багийг 2-0 гэсэн харьцаатайгаар буулган авч, түүхэндээ анх удаагаа Мэйжорын хасагдах шатанд шалгарлаа.

Энэ удаагийн Мэйжорын "Opening Stage" буюу нээлтийн шатанд тив бүрийн шилдэг 16 баг өрсөлдсөн бөгөөд үүнээс ердөө найм нь "Elimination Stage" буюу хасагдах шатанд оролцох юм.

Монголчууд багаараа дөрөв дэх удаагаа Мэйжорт оролцож, ийнхүү анх удаагаа эхний шатаа давлаа. Үүгээр ч зогсохгүй Ази, Номхон далайн бүс нутгийн чансааг ахиулж, ирэх Шанхайд болох Мэйжорт энэ бүс нутгаас гурван баг оролцох эрхтэй боллоо.

Дэлгэрэнгүйг энд дарж уншина уу.

АХМАД НАСТНЫ ТЭТГЭВРИЙГ 100 МЯНГАН ТӨГРӨГӨӨР НЭМЛЭЭ

Засгийн газрын /2024.03.20/ хуралдаанаас гаргасан шийдвэрийн талаар Хөдөлмөр нийгмийн хамгааллын сайд Х.Булгантуяа мэдээлэл хийлээ.

Тэрбээр 2024 оны дөрөвдүгээр сарын 1-ээс эхлэн Нийгмийн даатгалын сангаас олгож байгаа болон Цэргийн албан хаагчийн тэтгэврийн хэмжээг 100 мянган төгрөгөөр нэмэгдүүлэхээр шийдвэрлэлээ.

Нийт 499.2 мянган тэтгэвэр авагч хамрагдана. Энэ нэмэгдэлд 449.3 тэрбум төгрөг зарцуулж байна. Дундаж тэтгэврийн хэмжээ өнөөдөр 685.6 мянга байгаа бол 100 мянган төгрөгөөр нэмэгдсэнээр 785.6 мянган төгрөг болно.

Хувь тэнцүүлсэн тэтгэврийн доод хэмжээ 440 мянган төгрөг байгаа, мөн 100 мянган төгрөгөөр нэмэгдэж байна.

Халамжийн тэтгэвэр нэмэгдэхээр байгаа. Тэтгэвэр авах эрх үүсээгүй, хөгжлийн бэрхшээлтэй иргэн, хагас болон бүтэн өнчин 65,6 мянган иргэн халамжийн тэтгэвэр авдаг. Мөн 16 хүртэлх насны байнгын асаргаа шаардлагатай хөгжлийн бэрхшээлтэй хүүхэд амьжиргааг дэмжих мөнгөн тэтгэмж авдаг. Нийт 12,8 мянган иргэнд энэ тэтгэмжийг.олгодог. 2020 онд мөнгөн тэтгэмж 188 мянган төгрөг байсныг 100 мянган төгрөгөөр нэмэгдүүлж байсан бол 2023 онд 12.8 хувиар нэмэгдүүлсэн. Ирэх дөрөвдүгээр сарын 1-ээс 50 мянган төгрөгөөр нэмэгдүүлснээр 375 мянган төгрөг болж байгаа гэлээ.

Дэлгэрэнгүйг энд дарж уншина уу.

МАЛЧДАД 5-8 САЯ ТӨГРӨГИЙН ХҮҮГҮЙ ЗЭЭЛ ОЛГОНО

Засгийн газрын /2024.03.20/хуралдаанаар хэлэлцэн шийдвэрлэсэн асуудлын талаар Засгийн газрын хэрэг эрхлэх газрын дарга Д.Амарбаясгалан мэдээлэл хийлээ.

Энэ үеэр тэрбээр малын хорогдол өнөөдрийн байдлаар 6 саяд хүрсэн. Урьдчилсан байдлаар 20 сая толгой мал хорогдоно гэдэг судалгаа гарсан. Энэ нь 20 мянга орчим малчин малынхаа 70-аас дээш хувийг алдах эрсдэл байна. Ийм учраас малчдад урт хугацаатай хүүгүй зээл олгоно. Хөдөлмөр нийгмийн хамгааллын харьяа Хөдөлмөр эрхлэлтийг дэмжих санд 107 тэрбум төгрөг байгаа. Эндээс малгүй болсон иргэдэд 5-8 сая төгрөгийн хүүгүй урт хугацаат зээл олгож, дэмжлэг үзүүлнэ.

Бэлчээрийн мал аж ахуй цаашдаа энэ хэлбэрээр эрсдлийг даван туулах боломжгүй учраас Засгийн газраас ойрын хугацаанд уламжлалт мал аж ахуйд тулгамдаж буй сөрөг нөлөөллийг бууруулах тухай хуулийн төслийг УИХ-д өргөн барина.

Үндэсний баялгийн сангийн тухай хуулийн төслийг УИХ-д өргөн мэдүүлэхээр боллоо. Баялгийн сан дотроо гурван сантай байх зохицуулалтыг хийж байна гэлээ.

Дэлгэрэнгүйг энд дарж уншина уу.

МАН-ЫН БАГА ХУРАЛ МӨРИЙН ХӨТӨЛБӨРӨӨ БАТАЛЛАА

МАН-ын Бага хурал 2024 оны намын хөтөлбөрөө баталж, бусад асуудлаа хэлэлцэж, өндөрлөлөө. Мөн Бага хурлаар 2024 оны УИХ-ын сонгуульд нэр дэвгчид тавигдах журамыг баталсан байна.

МАН-ын хувьд мөрийн хөтөлбөрөө баталсан учраас гуравдугаар сарын 24-ны өдөр мөрийн хөтөлбөрөө Үндэсний аудитын газарт хүргүүлэх юм байна.

Дэлгэрэнгүйг энд дарж уншина уу.