УИХ-ын сонгууль дөхөхөөр улс төрийн жижиг намууд амь орж, нэрээ өөрчлөхөөс эхлээд косметик засвар хийж, бэлтгэл хангадаг. Энэ жишгээр УИХ-ын гишүүн асан Л.Гүндалай 10-аад жилийн өмнө байгуулсан намынхаа дарга болжээ. Тодруулбал, Монгол Улсын дээд шүүхийн нийт шүүгчийн хуралдаан өчигдөр /2024.03.21/ болж, Ард түмний хүч намаас ирүүлсэн “намын даргын өөрчлөлтийг улсын бүртгэлд бүртгүүлэх” тухай өргөдлийг хэлэлцээд намын даргаар Л.Гүндалайг бүртгэсэн байна.

УИХ-ын гишүүн асан Л.Гүндалай 2016 оны УИХ-ын сонгуульд өрсөлдөх зорилгоор 2015 онд Ард түмнээ хайрлая намыг байгуулсан юм. Гэвч УИХ-ын сонгуульд өрсөлдөөд ялагдсан тул тун удалгүй намаасаа гарч, Ардчилсан намд эргэн ирснээ зарласан удаатай. УИХ-ын 2020 оны сонгуульд Ардчилсан намаас нэр дэвших квот олдохгүй болонгуут буцаж, намдаа ирсэн. Мөн л дээрх сонгуульд амжилт олоогүй. Энэ хооронд эхнэр Л.Аззаяа нь Ард түмнээ хайрлая намын даргаар ажиллаж, 2023 онд Улсын дээд шүүхэд хандан намын нэрийг өөрчлөх хүсэлт гаргасныг хүлээн авсан. Ингэснээр тус намын албан ёсны нэр Ард түмний хүч болж өөрчлөгдсөн.

УИХ-ын 2024 оны сонгуулийг холимог тогтолцоогоор зохион байгуулна.

Улс төрийн жижиг намууд эвсэж энэ удаагийн сонгуульд оролцохгүй бол тойрог томссон нөхцөлд амжилт олох боломж хомс. Гэвч одоогоор Л.Гүндалайн хувьд бусад жижиг намуудтай нэгдэн сонгуульд оролцох эсэх нь тодорхойгүй байна.

Г.ХОРОЛ