Цахим спортын "CS2"-ийн анхны Мэйжор тэмцээн Данийн Копенхаген хотноо үргэлжилж байна. Нийт 1.25 сая ам.долларын шагналын сантай тус тэмцээний хасагдах шат өчигдөр/2024.03.21/ эхэлж, дэлхийн шилдэг 16 баг эхний тоглолтуудаа хийлээ. Ази, Номхон далайн цор ганц төлөөлөл болсон Монголын "The MongolZ" баг хасагдах шатны эхний өдөр хоёр тоглов. Эхлээд дэлхийн чансааны зургадугаарт эрэмбэтэй, 2021 оны Стокхольмын Мэйжорын аварга, Украины алдарт "NaVi" багийн эсрэг учраа таарч, 13-10 гэсэн харьцаатай хожигджээ. "Mirage" дээр болсон тоглолтод "NaVi" багаараа тун сайн тоглолтыг үзүүлж, "jL", "b1t", "w0nderful" нар онцгойрсон. Харин "The MongolZ"-оос багийн ахлагч "bLitz" тэгш тоглолтыг толилуулав.

Ийнхүү 0-1 гэсэн амжилттай болсон Монголын багийн дараагийн өрсөлдөгч нь 2023 оны Парисын Мэйжорын аварга, дэлхийн шилдгүүдийн нэг, Францын "Vitality" баг байлаа. Өнөө цагийн "CS"-ийн гоц авьяастнуудын нэг "ZywOo" тэргүүтэй тус баг эхний тоглолтдоо Туркийн "Eternal Fire" багт 10-13 гэсэн харьцаатай хожигдож, улмаар "The MongolZ"-той учраа таарав. Хоёр багийн тоглолт "Nuke" дээр болсон бөгөөд эхний хагаст "The MongolZ" 7-5 гэсэн харьцаатай илүүрхсэн ч хоёрдугаар хагаст "Vitality" тактик, туршлага зааж, 13-9 гэсэн харьцаатай хожжээ.

Ийнхүү "The MongolZ" нээлтийн шаттай адил 0-2 гэсэн амжилттай, тааруу эхлэлийг тавилаа. Гэхдээ Монголын баг хэдийнэ дэлхийн шилдгүүдтэй эн тэнцүү өрсөлдөөн үзүүлж, амаргүй өрсөлдөгч гэдгээ харуулж байна. Гагцхүү жижиг алдаанууд, тактикийн тоглолтууд л тоглолтын хэмнэлийг өөрчилж, эсрэг багт нь боломж болов. Одоо тэдэнд хожигдох эрх үгүй.

Өнөөдөр 22.00 цагаас "The MongolZ" Мэйжорыг цааш үргэлжлүүлэх эсэх чухал тоглолтыг Бразилын "paiN" багийн эсрэг хийнэ. Хожигдсон нь гэртээ харих бол хожсон нь дахин нэг тоглолтыг хийх болно. "paiN" багийн тухайд өчигдөр АНУ-ын "Complexity" болон Оросын "Virtus.pro" багуудад хожигдож, 0-2 гэсэн амжилттай болжээ. Харин тэд нээлтийн шатанд "Apeks", "Ence", "SAW" багуудыг хожиж, хасагдах шатанд шалгарчээ.

Хоёр баг өмнө нь учраа таарч байгаагүй.

"The MongolZ"-ийн хувьд Бразилын багуудын эсрэг 7-1 гэсэн сүрдэм үзүүлэлттэй явна. Зөвхөн "Imperial" баг "IHC Esports" гэх нэртэй байхад нь 2022 оны Мэйжорт 2-1 гэсэн харьцаатай хожсон түүхтэй.

Саяхан "The MongolZ"-д хожигдсон Бразилын “Legacy” багийн ахлагч NEKIZ буюу Габриель Шенато “HLTV”-д өгсөн ярилцлагадаа “Бразилчууд биднийг “The MongolZ”-ийг хожно гэж бодож байсан байх. Гэхдээ тэд үргэлж Бразилын багуудтай тоглодог, тэднийг сүйрүүлдэг. Тэгэхээр дарамт нэг их биш ч гэсэн бага зэрэг байсан. Бид үнэхээр итгэлтэй байсан. Харамсалтай нь, Мэйжорт гаргаж болохгүй алдаа гаргалаа” гэжээ.