Нийтийн тээврээр үйлчлүүлж байгаа зорчигч бүрийн толгойг тоолох тухай мэдээлэл олон нийтийн сонирхлыг ихэд татсан. Зарим нь нийтийн тээврийн үйлчилгээ, хүртээмжийг сайжруулахад энэ арга чухал нөлөөтэй гэсэн бол өөр нэг хэсэг нь туулайчилж байгаа хүмүүсээ л болиулах хэрэгтэй. Энэ арга бол зохисгүй гэлцгээнэ. Тэгвэл тус ажлын туршил эхлээд хэдийнэ долоо хоног өнгөрчээ.

Өнөөдөр /2024.03.20/ Хотын дарга Х.Нямбаатар зорчигчдын толгойг тоолж хулгайтай тэмцэж байгаа нь юу нь буруу байгаа юм бэ? Автобусаар зорчигчдыг тоолох ажлын туршилт эхлээд долоо хонож байна гэв.

Цөөн тооны автобусанд толгой тоолдог төхөөрөмжийг суурилуулсан бөгөөд автобусанд нийт орж байгаа хүний тоо болон карт дарж зорчиж байгаа хүмүүсийн тоотой харьцуулж судалгааны дүнг гаргах аж.

Нийслэлээс жил бүр 200 гаруй тэрбум төгрөгийг автобусаар хөнгөлөлттэй үнээр үйлчилдэг иргэдэд зориулж олгодог. Жил ирэх тусам энэхүү татаасын хэмжээ нэмэгдсээр байгаа нь татвар төлөгчдийн мөнгийг үр ашиггүй зүйлд зарцуулдаг гэх шүүмжлэл дагуулсаар буй. Иймээс нийслэлээс татаас хэлбэрээр олгож байгаа энэхүү мөнгөн дүн хэр бодитой вэ гэдэг тооцооллыг гаргах. Мөн автобусаар үйлчлүүлж байгаа иргэдийн хэдэн хувь нь төлбөрөө төлж зорчиж байна вэ зэрэг нарийн мэдээллийг гаргахад энэхүү толгой тоолох ажлын нэг зорилго оршиж байгаа аж. Улаанбаатарын хэмжээнд өдөр бүр 1000 гаруй автобус нийтийн тээврийн үйлчилгээнд гарч байгаа юм.

Хэрэв толгой тоолох төхөөрөмжийн туршилт амжилттай болбол ирэх саруудад нийт автобусанд суурилуулах ажил эхэлнэ.