Шивээсний урлаг сүүлийн 20 жилийн хугацаанд төрөл бүрээр хувьсан өөрчлөгджээ. Эртнээс уламжилсан энэ урлаг улам л олон талыг илэрхийлсэн, улам л инновацилаг болж байна. Өнөө цагт шивээс гэдэг урлагийн бүтээл гэх үндсэн ойлголтоосоо гадна хагалгааны дараах шархыг хүртэл нуун далдлах нэгэн хэрэгсэл болсон. Мөн нийгмийн цөөнхийн өөрсдийгөө сурталчлах, бусдаас ялгаатай байдлаа таниулах нэг хэрэгсэл болжээ.

Шивээс сонгох явц ч 20 жилийн өмнөхөөс эрс өөр болсон. Шивээсний газрын хүлээлгийн танхимд хүмүүс каталог эргүүлэн суудаг байсан бол өдгөө цахим сүлжээ гэж том талбараас эрэл хайгуулаа хийж байна. Үүнийг дэлхийн өнцөг булан бүрээс хэн ч чөлөөтэй хэрэглэж болно.

"Tattoo You – A New Generation of Artists" нэртэй шинэ ном саяхан хэвлэгдсэн. Уг номд дэлхийн хамгийн шинэлэгт тооцогдож буй 75 зураачийн бүтээлүүдийг нэтгэжээ. Шивээс бол хувцастай адил үүрэгтэй гэдэг санааг уг номд дэвшүүлсэн байна. Өөрөөр хэлбэл, хүн шивээс хийлгэснийхээ дараа гэртээ байгаа мэт, гэрийн хувцастайгаа яваа мэт тухтай мэдрэмжийг авах ёстой аж.

Дээрх номд гарсан шивээснүүдээс хамгийн сонирхолтой, ер бусын есөн шивээсийг түүвэрлэн хүргэж байна.

1.Сингапур шивээсчин Иан Дамиен "Шивээс нь дулаан тэврэлт мэт санагдах ёстой" гэж хэлсэн байдаг. Түүний зоримог бүтээлүүд нь нарийн төвөгтэй геометрийн дүрсүүд болон Японы уламжлалт дүрслэлүүдээс бүтдэг. Мөн түүхийг хадгалахын сацуу орчин үеийн хэлбэр, хэв маягт шилжүүлэх зорилготой аж. Тэр карьераа эхлүүлээд дөнгөж зургаан жил болж байгаа ч салбартаа танигдаж, сондгойрч чаджээ.

2."Шивээс нь эрэгтэй уран бүтээлчдийн хувьд хүч чадлын динамикаа урвуугаар ашиглах сайхан боломж" гэж аргентин шивээсчин Янина Александра хэлжээ. Аргентин дахь шивээсчдийн дөнгөж тавны нэг нь л эмэгтэйчүүд байдаг. Тэд энэ салбарыг аюулгүй бөгөөд илүү хүртээмжтэй болгоход гол үүрэг гүйцэтгэдэг.

Түүнийг шивээсний загвараа гаргахад 1980-аад оны арьс ширний соёл, кино урлаг, хувцас загвар нөлөөлжээ. Мөн эмэгтэйчүүдийг хэт хүлцэнгүйгээр дүрсэлдэг эцгийн эрхт ёсноос давж сэтгэдэг гэдгээрээ онцлог. Александрагийн дүрслэлүүдийг харвал эмэгтэйчүүдийг илүү хүчирхэг, элбэг дэлбэгээр харуулсан байдаг аж. "Би өөрийн амьдрал, үйл хөдлөлийг сонгох эрхтэй, хүчирхэг, эсэргүүцэгч эмэгтэйчүүдийг илэрхийлэхийг хичээдэг" гэж тэр хэлжээ.

3.Окланд гаралтай уран бүтээлч Моко Смитийн бүтээлийн гол цөм нь Маоригийн өв уламжлал юм. Тэрбээр энэ тухайгаа ярихдаа "Өсч том болсон хойноо ард түмнээ сэрээж, хүчирхэгжүүлэхэд өөрийнхөөрөө хувь нэмрээ оруулахыг хүссэн. Үүнийг хийх арга зам нь миний хувьд шивээсний урлаг байв" гэжээ. Тэрбээр хоёр ачааны чингэлэгээс бүтэх энгийн студид ажилладаг.

4.Гэтэл үүний эсрэгээр уламжлалыг устгахыг зорьж буй шивээсчид ч байна. Тэдний томоохон төлөөлөл бол Ганжи Банг. Тэрбээр санаанд оромгүй зүйлсийг сэдсэнээрээ Японы ардын аман зохиолыг үгүйсгэдэг. Японы ардын аман зохиолд гардаг аймшигт мангасын дүрсийг тэр ихэвчлэн ашигладаг. Түүний үйлчлүүлэгчдийн дунд АНУ-ын реппер Пост Мэлоун багтдаг. Пост Мэлоун 2018 онд зүүн чамархайн дээрээ Япон маягийн дүрс шивүүлсэн.

5.Түмэн олон загварлаг шивээс дундаас хоолны дүрс сонгодог хүмүүс ч байх юм. Барселонд ажиллаж, амьдардаг шивээсчин Рионы гол загвар бол хоол хүнс. Тэрбээр хүүхэд ахуйгаасаа л манга комик номыг шимтэн уншиж, цуглуулдаг байжээ. Хүүхэлдэйн киног санагдуулам өхөөрдөм дүрснүүд түүний шивээсэнд зонхилно.

6.Парист ажиллаж, амьдардаг шивээсчин Блум шивээсийг арьсны байнгын гоёл гэж тодорхойлдог. Түүний бүтээлийн гол санаа нь цэцэг болон гоёл чимэглэл байдаг. Тэрбээр загвар өмсөгчөөр ажилладаг бөгөөд Инстаграмд 300 мянга гаруй дагагчтай.

7."Би шивээсээрээ бүх хүнийг төлөөлөх хүсэлтэй. Энэ нь шивээсний ертөнцийн жишигт нийцдэггүй хар арьст эмэгтэй миний хувьд маш чухал юм. Хүмүүс миний бүтээлээр өөрийгөө төсөөлөөсэй гэж хүсдэг" гэж Лондоноос гаралтай шивээсчин Жэйд Ф Кларк хэлжээ. Тэрбээр шивээсийг барууны ертөнцөд зонхилдог соёл гэж онцлон тэмдэглэжээ. Тиймээс зөвхөн цагаан арьсанд тохирдог бус, өөр өвөрмөц шивээсүүдийг санал болгохыг хичээдэг.

8.Шивээсийг илүү хүртээмжтэй болгох нэг арга бол бага төлөөлөлтэй бүлгүүдэд шивээс хийх. Бага төлөөлөл гэдэг нь нийт хүн амтай харьцуулахад харьцангуй цөөхүүлээ оршдог бүлэг бөгөөд хүйс, арьс өнгө, үндэс угсаа, бие бялдар, оюун санааны чадвар, LGBTQ+ статус зэрэг олон зүйл энд багтах юм. Чикагод ажиллаж, амьдардаг шивээсчин Жанани Натан 2021 онд Өмнөд Азийн олон үйлчлүүлэгчдийг татах, улмаар нийтлэг өв уламжлалтай хүмүүсийн нийгэмлэгийг бий болгохын тулд ийм бүлгүүдэд үнэгүй шивээс хийж эхэлжээ.

9.Заримдаа шивээс нь бусдаас ялгарах гэхээсээ илүүтэй нийцтэй байдлыг илэрхийлдэг. Их Британийн шивээсчин Таня Бакстон гоо сайхны чиглэлээр мэргэшсэн нэгэн бөгөөд сорви далдлах зэргээр мэс засалд орсон хүмүүст зориулж шивээс хийдэг. Ийм үйлчлүүлэгчдийн хувьд шивээс хийлгэх нь бие махбодиор тогтохгүй оюун санааны хүчтэй нөлөө болдог аж. Тухайн хүн дахин өөртөө итгэх итгэл, хяналтаа олж авч чаддаг. Танягийн хэлснээр олон хүний хувьд шивээс нь амьдралын баяр баясгалан, аяллын шинэ хуудас, урагшлах зам болдог. Шивээс гэдэг зүйл хэнд зориулагдсан бэ гэдэг хэвшмэл ойлголтыг Таня эвдэхийг хүсч байна.

Эх сурвалж: BBC