Нийтийн тээврийн салбарт парк шинэчлэлт хийж, түгжрэлийг бууруулахаар үе шаттай ажиллах талаар нийслэлээс мэдэгдсэн. Тодруулбал, энэ онд шинээр 600 автобус авч, үйлчилгээнд гаргах юм.

600 шинэ автобус үйлчилгээнд бүрэн гарснаар чиглэлийн хөдөлгөөнд хүлээгдэл үүсэх нь багасч, хүмүүс автобусаар бухимдалгүй, чөлөөтэй зорчих боломж бүрдэнэ. Одоогоор шинэ автобуснуудаас 457 нь үйлчилгээнд гарчээ.

Нийслэлээс өгч байгаа мэдээллээр, 600 шинэ автобус Улаанбаатарт бүгд ирсэн. Автобусны жолоочийн хүрэлцээ муу байгаагаас бүгд хөдөлгөөнд орохгүй байгаа гэв.

Нийтийн тээврийн салбар жолоочийн нөөц дутагдалтай байгаа тул дүүргүүдийн хөдөлмөр эрхлэлтийн албанд бүртгэлтэй В, С ангилалтай иргэдийг Зорчигч тээврийн нэгтгэлийн сургалтын төвд бүртгэн, мэргэшсэн жолоочийн сургалтад хамруулахаар бэлтгэл ажлыг хангаж эхэлсэн байна. Шинээр худалдан авсан автобусуудыг бүрэн үйлчилгээнд үйлчилгээнд гаргахын тулд эхлээд эзэнжүүлнэ. Дараагаар нь бүртгэлжүүлж, нийтийн тээврийн компаниудтай эргэн төлөлтөө тохирч, төлбөрийн картны систем суулгаж гаргах аж.