Израиль аравдугаар сарын 7-ноос хойш Газын зурваст халдлага үйлдэн, 13,000 гаруй хүүхэд амь эрсдсэн бол бусад нь хоол тэжээлийн дутагдалд орж, уйлах ч тэнхэлгүй болсон талаар НҮБ-ын Хүүхдийн сан (ЮНИСЕФ) мэдэгдэв. НҮБ-ын Хүүхдийн сангийн гүйцэтгэх захирал Кэтрин Рассел Ням гаригт “CBS News” сувагт ярихдаа " Мянга мянган хүүхэд шархадсан, алга болсоор байна. Ихэнх нь нурангид даруулсан байж болзошгүй. Урьд өмнө хүүхдийн нас баралтын тоо ийм өндөр байсныг бид мэдэхгүй. Эмнэлэгт байгаа хүүхдүүд хүнд хэлбэрийн хоол тэжээлийн дутагдалд орсон төдийгүй уйлах ч тэнхэлгүй, чимээгүй байна" гэжээ.

Израилийн дайныг "геноцид" хэмээн нэрийдэж, хоёр сая гаруй палестинчүүд өлсгөлөнд нэрвэгджээ. Түүнчлэн НҮБ-ын Палестины дүрвэгсдэд туслах агентлагийн (UNRWA) мэдээлснээр, Газын хойд хэсэгт хоёр хүртэлх насны гурван хүүхэд тутмын нэг нь хоол тэжээлийн дутагдалд орсон байна. Тус агентлаг мөн Израилийн таван сар гаруй тасралтгүй бөмбөгдөлтөд өртөж буй бүслэгдсэн бүс нутагт өлсгөлөн нүүрлэж байгааг анхааруулав. Дайны улмаас амь үрэгдэгсдийн тоо, Газын өлсгөлөнд нэрвэгдсэн хямрал, тус анклав руу тусламж хүргэхийг хориглосон гэх зэргээс Израилийг олон улс шүүмжилж байна. Израилийн Ерөнхий сайд Биньямин Нетаньяху сая гаруй палестинчуудын орогнож буй Египеттэй хил залгаа Рафах хотод хуурай замын дайралт хийнэ гэсэн сүрдүүлгээ Ням гаригт мэдэгдлээ. Израилийн цэргийн кампанит ажил аравдугаар сарын 7-ноос хойш Газын зурваст дор хаяж 31,645 палестинчууд, голдуу эмэгтэйчүүд, хүүхдүүдийг хөнөөж, хоёр сая орчим оршин суугчийг нүүлгэн шилжүүлсэн байна.

Эх сурвалж: Aljazeera