3х3 сагсан бөмбөгийн Азийн аварга шалгаруулах тэмцээн гуравдугаар сарын 27-ноос 31-ний өдрүүдэд Сингапурт болно. Эрэгтэй 23 улсын шигшээ баг, эмэгтэй 20 улсын шигшээ баг оролцох бөгөөд Монголын эрэгтэйчүүдийн шигшээ чансааны хоёрдугаарт, эмэгтэйчүүдийн шигшээ гуравдугаарт бичигдэж байна.

Урьдчилсан байдлаар багуудын бүрэлдэхүүн тодорчээ. Монголын эрэгтэй шигшээ багийн тухайд Хасын Хүлэгүүд багийн залуу тоглогчид болох А.Азбаяр, Ч.Тэмүүлэн, С.Биндэръяа нар багтсан аж. Харин эмэгтэй шигшээ багт үндсэн гэж хэлж болох Б.Ариунцэцэг, М.Цэрэнлхам, О.Хулан, Ө.Индра нар багтжээ.

Өнгөрсөн жил Монголын эрэгтэй шигшээ баг тивдээ хоёр дахь удаагаа түрүүлсэн билээ. Тус багийн бүрэлдэхүүнд А.Ананд, Д.Дэлгэрням, Э.Дөлгөөн, О.Энхбаатар багтаж байсан юм. Харин энэ жил өөрчлөлт оруулж, залуу тамирчдын нэрсийг өгчээ.

Монголын шигшээ багуудыг канад мэргэжилтэн Стив Сер удирдана.

Эрэгтэй шигшээ багийн тухайд тамирчдын бэртэл гэмтэл болон бусад шалтгаанууд бий. Э.Дөлгөөн дээд лигийн плей-оффын тоглолтын үеэр шагайндаа бэртэл авсан бол О.Энхбаатар нүүрэндээ цохиулж, хамгаалалттай тоглож байсан. Харин Д.Дэлгэрнямын бугуйны бэртэл удаан хугацаанд үргэлжилж, А.Ананд саяхнаасаа бэртлээсээ эргэн ирсэн билээ.

Мэдээж тивийн аваргын тэмцээнээс илүүтэйгээр олимпийн эрхийн тэмцээнүүд Монголын багийг хүлээж байна. Тиймээс олимпийн эрхийн тэмцээнүүддээ анхаарлаа хандуулж, энэ удаагийн Азийн аваргад үндсэн бус илүү залуу тамирчдаа оролцуулж, туршлагажуулах бодлого баримталж байгаа харагдана.