Олимпийн үеэр гал зогсоохыг Оросоос хүснэ

Парис-2024 зуны олимпийн наадмын үеэр түр гал зогсоохыг Оросоос хүснэ гэж Францын ерөнхийлөгч Эммануэль Макрон ярилцлага өгөхдөө хэлжээ. "Олимпийн үеэр гал зогсоохыг хүснэ. Оросууд үүнийг зөвшөөрөх ёстой. Үргэлж л ийм байсан шүү дээ. Энэ талаар хүсэх болно. Бид үүнийг хүснэ. Зохион байгуулагч орны хувьд Олимпийн дүрэм журамтай хөл нийлүүлэх ёстой. Энэ бол энх тайвны мессеж. Бид Олимпийн хорооны шийдвэрийг дагах болно" гэж Макрон хэлэв.

Олон улсын Олимпийн хороо Оросоос Украинд түрэмгийлснийг буруушааж буй. ОХУ-ын засгийн газар энх тайван болон яриа хэлэлцээг дэмжихэд спортын хүчийг ашиглах зорилготой Олимпийн эвлэрлийн дүрмийг зөрчсөн гэж тус хороо үзжээ.

ОХУ-ын Олимпийн хорооны ерөнхийлөгч өнгөрсөн Пүрэв гаригт мэдэгдэл хийхдээ, "Украиныг эзлэн түрэмгийлсний төлөө тамирчдад тавьсан хоригийг үл харгалзан бид энэ жилийн Парисын Олимпийг бойкотлохгүй" гэжээ. Харин Парис хотын дарга Анн Идалго Лхагва гаригт ярилцлага өгөхдөө "Орос, беларусьчууд ирэхгүй байсан нь дээр" гэж хэлсэн юм. Оросын түрэмгийлэл эхэлсний дараахан дээрх хоёр орны тамирчдыг олон улсын спортын тэмцээнд оролцохыг нь хориглосон.

Эх сурвалж: REUTERS