Францын Ерөнхийлөгч Эммануэль Макрон барууны орнуудын хуурай замын цэргийг Украин руу илгээхийг үгүйсгэхгүй гэдгээ дахин мэдэгдэв. Тэрбээр Пүрэв гаригийн орой "Бүх сонголтууд боломжтой. Украинд энх тайван тогтоохын тулд сул дорой байж болохгүй. Бид нөхцөл байдлыг ухаалгаар харж, Оросыг дайнд ялуулахгүйн тулд бүх л шаардлагатай арга хэрэгслийг ашиглахад бэлэн гэдгээ шийдэмгий илэрхийлэх ёстой. Оросын арми Украины эсрэг түрэмгий дайндаа ямар нэгэн хязгаарлалт тогтоохгүй байгаа тул барууны орнууд ч тусламжиндаа ямар нэг хязгаарлалт тавих шаардлагагүй.

Хариуцлага хүлээх ёстой ганц хүн нь Кремлийн тэргүүн. Тэр бол бид биш. Бид хэзээ ч довтолгоонд оролцохгүй, бид хэзээ ч санаачлага гаргахгүй. Франц бол энх тайванч улс.

Хэрэв Орос ялвал францчуудын амьдрал өөрчлөгдөнө. Бидний хувьд Европт аюулгүй байдал гэж байхгүй болно. Путины хүсэл Украинаар зогсохгүй байж магад" гэжээ.

Макрон өнөөдөр Берлин хотноо Германы канцлер Олаф Шольц, Польшийн Ерөнхий сайд Дональд Туск нартай уулзана.

Эх сурвалж: DPA INTERNATIONAL