ОХУ-ын сөрөг хүчний улстөрч агсан Алексей Навальныйн урт хугацааны, ойрын холбоотон Леонид Волков халдлагад өртжээ. Тэрбээр Литва дахь гэрийнхээ гадаа Мягмар гаригт халдлагад өртсөнийг Навальныйн хэвлэлийн төлөөлөгч Кира Ярмыш мэдэгдэв. Түүнийг машиндаа сууж байхад нь алх болон нулимс асгаруулагч хийгээр халдсан байна.

Халдлага үйлдэгч нь хэн болох, ямар сэдэлтэй гэдэг нь тодорхойгүй байна. Литва улсын цагдаа нар мэдээллийг хүлээж аваад, мөрдөн байцаалт эхлүүлсэн гэлээ.

Навальныйн багийн өөр нэг гишүүн Иван Жданов цахим сүлжээндээ Волковын халдлагад өртсөн зургийг нийтэлжээ. Зургаас харахад Волков зүүн хөлөндөө шарх авсан байв. Халдлага үйлдэгч этгээд нэг ч үг дуугараагүй, бүх зүйл чив чимээгүй өрнөсөн гэдгийг Жданов хэлжээ. Мэдээж энэ бол улс төрийн зорилготой халдлага гэж тэр үзэж байна.

Өдгөө 43 настай Волков өдгөө эмнэлгээс гарсан бөгөөд гар нь хугарч, хөлөөрөө сайн алхах боломжгүй байгаа аж.

Волков өөрийн аюулгүй байдлын үүднээс сүүлийн хэдэн жилийн турш Орост амьдраагүй. Орост амьдардаггүй хэдий ч Навальныйн багийн үйл хэрэгт идэвхтэй оролцдог байжээ.

Тэрбээр Навальныйг өнгөрсөн сард гэнэт нас барах хүртэл түүний штабын даргаар ажиллаж байжээ. Волков ОХУ-д улс төрийн зорилготой өөр хэд хэдэн хэрэгт буруутгагдаад буй. Тэрбээр саяхныг хүртэл Навальныйн Авлигатай тэмцэх сангийн даргаар ажиллаж байсан. Гэвч Оросын зарим хориг арга хэмжээг цуцлахыг шаардсан захидалд гарын үсэг зурсан нь илчлэгдсэний дараа огцорсон юм.

Эх сурвалж: BBC