Сумдад тараасан төмөр хүлгүүдийн үнэтэй танилц!

Зудад нэрвэгдсэн сумдын Засаг даргын Тамгын газар болон Эрүүл мэндийн төвд Засгийн газрын нөөц сангаас 15 тэрбум төгрөгийг гаргаж, туулах чадвар сайтай гурван төрлийн 105 автомашин худалдан авсан. Тодруулбал, "Ford", "Nissan", "Suzuki" брэндийн машиныг "MSM" групп Засгийн газарт хөнгөлөлттэй үнээр нийлүүлж, бүх машинд нэмэлтээр халаагч суурилуулж, өвлийн дугуйг сольж өгсөн гэдгийг ЗГХЭГ-ын дарга Д.Амарбаясгалан мэдээлсэн юм. Тэгвэл эдгээр төмөр хүлгийн үнэ зах зээл дээр хэдэн төгрөгийн үнэтэй байгааг танилцуулъя.

ЦОО ШИНЭ ЗАГВАР НЬ 135-145 САЯ ТӨГРӨГИЙН ҮНЭТЭЙ

"FORD RANGER PICKUP" ЗАГВАРЫН АВТОМАШИН

Хот, хөдөөгийн аль ч амьдралын хэв маягт тохиромжтой бөгөөд ажил, аялал болон гэр бүлийн хэрэгцээнд зориулан бүтээсэн автомашин. Дэлхийн 180 гаруй орны зам, нөхцөл байдалд зориулж бүтээсэн гэдгээрээ онцлог. Монголын зах зээл дээр худалдаалж буй үнийн хувьд цоо шинэ нь 135-145 сая төгрөгийн үнэтэй байна. Энэ загвараас 30 ширхэг автомашин худалдан авахад 4.3 тэрбум төгрөг болж байгаа юм.

Засгийн газраас цаг үеийн яаралтай арга хэмжээний хүрээнд Монголын албан ёсны компаниудад борлуулж байгаа баталгаатай, туулах чадвар сайтай автомашинуудыг нэн даруй худалдаж авсан гэдгийг албаныхан мэдээлсэн. "Автомашинуудыг гаднаас захиалж авбал багадаа хоёр жил хүлээх шаардлагатай болно. Эхний ээлжинд 100 сумыг туулах чадвар сайтай машинаар хангана. Нэг аймгийн таван сумд машин өгч буй. Цөөн сумтай аймагт 2-3 машин өгсөн" гэдгийг УОК-ын нарийн бичгийн дарга Т.Баярхүү хэлж байв.

"ЖИМНИ" ЗАГВАР 75-110 САЯ ТӨГРӨГИЙН ҮНЭТЭЙ

"SUZUKI JIMNY" ЗАГВАРЫН 5 ХААЛГАТАЙ АВТОМАШИН

Японы алдартай "Сүзүки мотор" корпорацийн үйлдвэрлэдэг "Жимни" загварыг 1970 онд анх зохион бүтээсэн, 53 жилийн түүхтэй автомашин. Уг автомашин нь дөрвөн дугуйн хөтлөгчтэй тул цас, шавар, ус, хад чулуу зэрэг бартаат замыг туулах онцгой чадвартай, ашиглалтын зардлын хувьд том оврын, тансаг жийп автомашинаас 3-4 дахин бага, хамгийн авсаархан хийцтэй, бат бөхийн тухайд бол өрсөлдөх чадвар хамгийн өндөр зэрэг онцлог чанаруудаараа дэлхийн зах зээл бусад машинуудаас ялгардаг цорын ганц автомашин.

"Жимни"-гийн загвараа анх удаа таван хаалгатай болгон шинэчилсэн байдаг. Энэ оны нэгдүгээр сарын 11-ний өдрөөс Монголын зах зээлд анхлан танилцуулсан байв. Зах зээл дээрх үнэ нь таван хаалгатай загвар нь 110 сая төгрөг бол гурван хаалгатай загвар нь 75 сая төгрөгийн үнэтэй байна. Энэ загвараас 30 ширхгийг худалдан авахад 3.3 тэрбум төгрөг болж байгаа юм.

Өвөлжилт, хаваржилт нэн хүндэрсэн 21 аймгийн 100 суманд туулах чадвар сайтай, шинэ буюу 100 километрээс бага гүйлттэй, орон нутагт туршигдсан, хэрэглээнд нэвтэрсэн, өвөл, зуны есөөс доошгүй дугуйтай, баталгаат хугацаатай автомашинуудыг олгосон гэдгийг албаныхан мэдээлж, /2024.03.02/ орон нутгийн төлөөлөлд гардуулан өгсөн. Эхний ээлжийн машинуудыг Төв аймгийн Лүн, Бүрэн, Баян-Өнжүүл, Баянжаргалан, Өндөрширээт, Дундговь аймгийн Дэрэн, Дэлгэрцогт, Луус, Өндөршил, Гурвансайхан, Дорноговь аймгийн Засаг даргын тамгын газарт гардуулан өгсөн юм.

ЗАХ ЗЭЭЛ ДЭЭРХ ҮНЭ НЬ 179 САЯ ТӨГРӨГ

"NISSAN NAVARA" ЗАГВАРЫН АВТОМАШИН

"Nissan Navara" загварын автомашин нь 2.5L – н багтаамжтай турбо хөдөлгүүртэй бөгөөд энэ хөдөлгүүр нь ашигт ажиллагаа, өндөр гүйцэтгэлийг гаргана. Таны автомашиндаа суурилуулсан чирэгчийн чанараас хамааран 3500кг хүртэлх ачааг чирэх боломжтой. Зах зээл дээрх үнэ нь 179 сая төгрөг байна. Энэ загвараас 30 ширхэгийг худалдан авахад 5.3 тэрбум төгрөг болж байгаа юм.