Хөгжлийн банкны гэх тодотголтой 80 хүн, дөрвөн хуулийн этгээдэд холбогдох нийслэлийн Эрүүгийн хэргийн давж заалдах шатны шүүх хурал өнөөдөр /2024.03.11/ Улаанбаатар чуулгын байранд хоёр дахь өдрөө үргэлжилж байна.

Шүүх хурлын талаар УИХ-ын гишүүн асан О.Баасанхүү дараах тайлбар хийлээ. Тэрбээр “Хөгжлийн банкны гээд байгаа энэ асуудлыг хэтэрхий улстөржүүлсэн болохоос биш жинхэнэ гэмт хэрэг хийсэн хүмүүс орж ирээгүй. Ихэвчлэн Ардын намын хүнд гарууд байгаа. Банк хоёр аргаар  санхүүжилт авдаг. Нэг нь нэр хүндээрээ авдаг бол нөгөө нь ашигтай зээлдэгч нараараа авдаг. Гэтэл дуулиан шуугиан болгож, ашигтай зээлдэгч нарыг нь хүчээр гаргаснаас болж, Хөгжлийн банкны нөхцөл байдал сайнгүй байгаа гэж дуулсан.

Анхан шатны шүүх энэ хэргийг ажлын 47 хоног буюу гурван сар орчим хугацаанд хуралдан, тал бүрээс нь шүүгээд шийдвэр гаргасан.  Анхан шатны шүүхийн шийдвэр зөв байсан. Юунд нь прокурор эсэргүүцээд байгааг ойлгохгүй байна, шүүх хуралд ороод тайлбараа өгөөд явна.

Ер нь бол зээл аваад төсөл нь хэрэгжсэн, ажил хийсэн хүмүүсийг бүдүүлгээр гутаах, доромжлох гүтгэх байдлаар ихэнхийг явуулсан.  Ажил хийж байгаа юм чинь дунд нь алдаа гарсан байхыг үгүйсгэхгүй. Гэхдээ л нийтэд нь хоморголсон.

Ардчилсан намыг Засгийн эрх барьж байхад нүүрсний үнэ 1 тонн нь 30 ам.доллар, зэсийн үнэ 4200 ам.доллар байсан. Ийм үед аймгуудыг Улаанбаатар хоттой хатуу хучилттай авто замаар холбох, түгжрэлтэй тэмцэх, төмөр замын бүтээн байгуулалтыг эхлүүлсэн гээд зөндөө олон ажил хийсэн.

Гэтэл өнөөдөр нүүрсний үнэ 100-300 ам.доллар, зэсийн үнэ 20.000-21.000 ам.доллар болсон байтал 40 их наядын хулгай хийсэн хүмүүс юу хийсэн юм бэ” гэлээ.

Г.ХОРОЛ