Өнгөрсөн амралтын өдрүүдэд “Бүргэдийн баяр-2024” наадам өргөн дэлгэр болж өндөрлөлөө. Энэ жилинй наадмыг гадаад, дотоодынхон өнгөрсөн жилүүдээс илүү зорьж ирсэн бөгөөд тэмцээн, уралдааны төрөл нэмэгдсэн онцлогтой. Тухайлбал, бүргэдчид тулам булаацалдах, газраас зоос шүүрэх, бүргэдээр хиймэл ан бариулах гэсэн гурван төрөлд өрсөлдөж, зорин очсон жуулчид ам, нүд булаалдан шагшина.

Үндсэн өрсөлдөөнөөс гадна морьт харваа, анч нохдын үзүүлбэр, хоол хүнс, гар урлалын бүтээгдэхүүний үзэсгэлэн худалдаа, бусад үйлчилгээг дэлгэжээ. Мөн нээлтийн үеэр шилдэг 21 бүргэдчинийг алдаршуулав.

Монгол орон түүх соёл, өв уламжлал арвинтай, олон ястны өлгий нутаг. Тиймдээ ч бүргэдийн баяр нийслэлчүүд болон жуулчдын хүсэн хүлээж, зорин ирдэг нэгэн том баяр болсон байна. Өвлийн аялал жуулчлалыг хөгжүүлэх энэ үйл ажиллагааг зохион байгуулагчдын зүгээс онцгой анхаарч, хөтөлбөр, тэмцээн уралдаан, худалдааг өргөн хүрээнд гаргахыг хичээдэг.

Төв Азийн нүүдэлчдийн дунд 6000 жилийн тэртээгээс хадгалагдан ирсэн бүргэдээр ан хийх соёлыг өвлөн тээж, хойч үедээ уламжлуулж буй үндэстэн бол монголчууд. Үүнийг ч жуулчид олзуурхан, наадмын хугацааг урьдчилан товлож Улаанбаатарт зочилдог.

Зөвхөн бүргэдийн ан ав, эдлэл хэрэгслээс гадна бусад үзүүлбэрүүд ч Монголыг олон улсын аялагчдад сурталчилдаг. Тэр утгаараа онцлог хөтөлбөрийг энэ удаад зохион байгуулагчид нь гаргажээ.

Хаврын улирал, Наурызын баярыг угтан казах үндэстний ёс зан заншил, өв уламжлал, дахин давтагдашгүй өвөрмөц соёлыг сурталчлан таниулах, залуу үедээ өвлүүлэн үлдээх зорилгоор “Бүргэдийн баяр” наадмыг энэ жил 18 дахь удаагаа зохион байгуулсан.

“Монголд зочлох жил”-ийн хүрээнд жуулчид ихээр ирж байгаагаар энэ удаагийн наадам илүү өргөн хүрээтэй болсон гэхэд хилсдэхгүй.

“Бүргэдийн баяр-2024” наадмаар махчин шувууг гаршуулан сургаж, ан ав хийж ирсэн энэхүү уламжлалт арга ухааныг “Шувуучлахуй”-гаар дамжуулан үзэгчдэд сонирхуулсан. Эл уламжлал нь Төв Азийн нүүдэлчдийн дунд 6000 жилийн өмнө үүсч, өдгөө хүртэл хадгалагдан ирсэн билээ. Монгол Улсын тухайд уг уламжлалыг 2010 онд ЮНЕСКО-ийн Хүн төрөлхтний Соёлын биет бус өвийн төлөөллийн жагсаалтад албан ёсоор бүртгүүлсэн юм.

Гэрэл зургийг Б.Батцагаан