Мэргэжлийн сүмо бөхийн Харү башё өчигдөр /2024.03.10/ Осака хотноо эхэллээ. Энэ удаагийн башё Мияагино дэвжээний асуудал дэвэрсний дараа болж байгаа гэдгээрээ тун онцлогтой. Хакүхогийн дэвжээнд тохиолдсон хүчирхийлэл, дээрэлхэлтийн хэргийн улмаас сүмогийн ертөнц хөдөлгөөнд орж, цаашдаа олон зүйл дээр өөрчлөлт хийх хэрэгтэй болов.

ЧАНСААГААРАА ТЭРГҮҮЛЖ БУЙ 3 МОНГОЛ БӨХ УНААГААР БАШЁГОО ЭХЛҮҮЛЛЭЭ

Башёгийн эхний өдөр дуулиан шуугиантай байлаа. Учир нь ёкозүна Тэрүнофүжи Г.Ган-Эрдэнэ эхний барилдаандаа комүсүби Нишикигид, озэки Киришима Б.Лхагвасүрэн комүсүби Абид, озэки Хошорюү С.Бямбасүрэн маэгаширагийн нэгдүгээрт эрэмбэтэй Үрад тус тус өвдөг шорооджээ. Өөрөөр хэлбэл, башёг чансаагаараа тэргүүлж буй гурван монгол бөх гурвуулаа унаагаар башёгоо эхлүүллээ.

Ёкозүнаг давж, шуугиан дэгдээсэн Нишикиги "Барилдааны үеэр хэцүү байдалд орсон ч хоёр гараараа аваргын бүснээс сайн атгаж чадсан учир давж чадлаа" гэжээ.

Удаан хугацааны гэмтлээсээ эргэн ирсэн ёкозүна Тэрүнофүжи Г.Ган-Эрдэнэ өнгөрсөн нэгдүгээр сарын Хацү башёд барилдаж, дээд зиндааны ес дэх түрүүгээ хүртсэн билээ.

ИСЭГАХАМАГИЙН ДЭВЖЭЭ ХААХ САНАЛЫГ ХОЛБОО ХҮЛЭЭН АВБАЛ МИЯАГИНО ДЭВЖЭЭ ХААГДАНА

Тэгвэл башёгийн гадна Хакүхо М.Даваажаргалын удирддаг Мияагино дэвжээний асуудал улам даамжирч байна. Саяхан сүмогийн холбоо шийдвэр гаргаж, Мияагино дэвжээг түр хугацаанд Тамакагид хариуцуулсан. Гэвч асуудал үүгээр дуусахгүй бололтой. Мияагино дэвжээг хаах тухай яриа гарах болов. Исэхгахама гэх олон дэвжээний нэг хэсэг болсон тус дэвжээг 43 дахь ёкозүна Ёшибаяама анх үүсгэн байгуулж, 1960 онд одоогийн нэрээ авч байлаа.

2022 онд Хакүхо М.Даваажаргал сүмогийн замналаа өндөрлүүлснээр багшийн замналаа эхлүүлж, өөрийн багш болох Чикүбаяамагаас энэхүү башёг өвлөн авсан. Хакүхо ч башёгоо өвлөн авсан даруйдаа байршлыг нь өөрчилж, хуучин Азүмазэки дэвжээний байранд нүүн орсон.

Тус дэвжээ нь Тоттори Жохокү ахлах сургуулиас бөхчүүдийг элсүүлдэг бөгөөд тус сургуулийн төгсөгчид Очиаи, Хокүсэйхо Э.Даваанинж, Ишиүра нарыг дэвжээндээ авсан түүхтэй.

Харү башёгийн эхний өдөр буюу өчигдөр Мияагино дэвжээний толгой Исэгахама дэвжээнээс сүмогийн холбоонд албан ёсоор Мияагино дэвжээг 2024 оны дөрөвдүгээр сарын 1-ний өдрөөс хаах, ирээдүйд нээх талаар дахин тунгаах саналыг хүргүүлжээ. Хэрэв сүмогийн холбоо Исэгахамагийн саналыг хүлээн авбал Мияагино дэвжээ хаагдах аж.

МИЯАГИНО ДЭВЖЭЭГ ХААХ САНАЛЫГ ЭСЭРГҮҮЦЭЖ, ГАРЫН ҮСЭГ ЦУГЛУУЛЖ ЭХЭЛЖЭЭ

Үүнтэй холбогдуулан Мияагино дэвжээний дэмжигчид болон ивээн тэтгэгчид гарын үсэг цуглуулж эхэлжээ. Тус саналын тодорхойлолтод "Мияагино дэвжээг хаах тухай Японы сүмогийн холбооны шийдвэрийг эсэргүүцэж байна. Шавь бөхийн үйлдсэн зодооны хүчирхийллийн хэрэг яригдаж байгаа Мияагино дэвжээнд хандаж Японы сүмогийн холбооноос санал болгож буй шийдвэрийг хатуу эсэргүүцэж байна.

Өмнө нь төстэй дуулиан дэгдээсэн хэргүүдэд авсан шийдвэртэй харьцуулахад хатуу шийтгэлийн шалтгааныг олон нийтэд ил болгохгүй бол сүмо сонирхогчид, дэвжээг дэмжигчид, олон төрлийн ивээн тэтгэгчид яасан ч хүлээж авах боломжгүйг мэдэгдье.

Өмнө болсон Токицүказэ дэвжээнд амь насаа алдсан явдлыг нуун далдалдсан хэрэг, Накагава дэвжээнд багш нар нь үйлдсэн зодооны хүчирхийлэл, Таканохана дэвжээ, Мичинокү дэвжээ, Исэгахама дэвжээнүүдийн өмнөх гаргасан зодооны хүчирхийлэлд дэвжээг хаахад хүргэсэн жишээ байхгүй" хэмээгээд "Мияагино дэвжээг хаах шийдвэрийг хатуу эсэргүүцэж байна" гэжээ.

Ийнхүү доор нь "QR" кодыг хавсарган цахимаар гарын үсэг цуглуулж байгаа аж.