Эрээний хилээр нэвтрэх ачаалал нэмэгдэж, иргэд 1-2 цаг дугаарлаж байгаа талаар олон нийтийн сүлжээнд цацагдах болсон  Энэ талаар одоогоор холбогдох албанаас ямар нэгэн мэдээлэл өгөөгүй, гаалийн шалгалттай холбоотой гэж иргэд ч хардаж буй.

Тодруулбал, ачаа тээшний хэмжээ, хүмүүсийн бичиг баримтын шалгалттай холбоотой хилээр нэвтрэхэд ачаалал нэмэгдэж байгааг тэнд дугаарлаж буй хүмүүст хэлжээ.

Эрээн хотод суугаа консулын газраас өнгөрсөн нэгдүгээр сард /2024.01.15/ анхааруулга, зөвлөмж мэдээллийг гаргасан. Тодруулбал, хилээр зорчих иргэн бүрт хамааралтай ачаа тээшний хэмжээг шинэчлэн тогтоосон юм. “БНХАУ-ын Гаалийн хууль”-ийн 4.46-д “Хувь хүн хилээр орох болон гарахдаа биедээ авч явах ачаа тээшний хэмжээ нь зохистой хэмжээнд байх ёстой бөгөөд зөвхөн өөрийн хэрэгцээний тоо хэмжээгээр хязгаарлагдана. Биедээ авч явах ачааг Гаалийн хяналтаар оруулна” гэж заасныг үндэслэн Эрээн хотын Гаалийн газар 2024 оны нэгдүгээр сарын 15-наас эхлэн авто замын боомтоор орох, гарах зорчигчдын биедээ авч явах эд зүйлийн хэмжээг зөвхөн өөрийн хэрэгцээнд зориулан зохистой хэмжээнээс хэтрүүлэхгүй байхыг анхааруулсан.

Тиймээс ачаа тээш хэмжээнээс хэт хэтрээгүй, рентгенээр хэвийн гарсан тохиолдолд хилээр чөлөөтэй нэвтрүүлж байгаа юм байна.

ХҮНИЙ АЧАА ТЭЭШ, БИЧИГ БАРИМТЫГ ХИЛ ДЭЭР ХАТУУ ШАЛГАЖ БАЙНА

Хилээр зорчиж байгаа иргэдээс ямар шаардлага тавьж байгаа талаар тодруулахад, Эрээний хилээр гарахад нэг хүн 30 кг-аас дээш ачаатай бол нэвтрүүлэхгүй байна. Учир нь Хятадын Гаалийн тухайд хуульд хилээр нэвтрэх хүний ачаа тээшний хэмжээг заасан. Тэр заалтын дагуу хилийн ажилчид хяналт, шаардлага тавьж байгаа гэсэн.

Хүмүүс тус хуулийн заалтыг нь мэдээгүйгээс болж бухимдаж байна.

Нэг талаар тус заалтын дагуу хил нэвтрэхэд ачаа, тээшний зөвшөөрөгдсөн хэмжээ чухал. Ихэнх хүн ачааны хэмжээ заагаагүй гэж ойлгож овор хэмжээ их, 50 кг-аас дээш хэмжээтэй тээштэй гардаг. Харин өчигдрөөс заасан хэмжээнээс илүү тээшийг хил нэвтрүүлэхгүй хатуу шаардлага тавьж байна. Ачаа тээшний хэмжээ хэт хэтэрснээс болж гаалийн рентген олон удаа эвдэрсэн бөгөөд хилийн зурвас болсон зузаан шилэн самбар нь ч хагарсан тохиолдолд гарсан гэдгийг зорчигчдод гаалийн байцаагч нар анхааруулжээ. Мөн бичиг баримтад тавих хяналтыг чангатгасан учир ачаалал үүссэн байна" гэлээ.