Г.Бадрах харцага дараалан түрүүллээ

Дорноговь аймгийн Мандах сумын түүхт 100 жилийн ойд зориулсан, Мандах сумын харьяат Монгол Улсын начин Алтангэрэлийн Хатансайханы нэрэмжит улс, аймгийн алдар цолтой хүчит 128 бөхийн барилдаан өнөөдөр/2024.03.09/ боллоо. Тус барилдаанд Хэнтий аймгийн Батширээт сумын харьяат, улсын харцага Ганцогтын Бадрах түрүүлж, Архангай аймгийн Батцэнгэл сумын харьяат, улсын үнэн зоригт харцага Батсүхийн Зоригтбаатар үзүүрлэв.

Г.Бадрах харцага өнгөрсөн Ням гаригт Бөхийн өргөөнд болсон Өмнөговь аймгийн Баян-Овоо сумын харьяат, улсын начин Дашдуламын Багахүүгийн нэрэмжит барилдаанд түрүүлсэн юм. Ийнхүү тэрбээр өргөөнд дараалан түрүүллээ.

Дөрөвт Булган аймгийн Хутаг-Өндөр сумын харьяат, улсын начин Х.Цогтгэрэл, Баянхонгор аймгийн Жинст сумын харьяат, улсын начин Э.Батмагнай нар шалгарлаа. Харин наймд улсын заан Б.Батмөнх, улсын харцага С.Сүхбат, улсын начин Б.Түмэндэмбэрэл, аймгийн хурц арслан О.Наранбаатар нар үлдэв. Нэрэмжит барилдаанаа зохион байгуулсан МҮБХ-ны тэргүүлэгч, улсын начин A.Хатансайханд МҮБХ болон ах дүү, хамаатан садан, ажлын хамт олон, найз нөхөд, нутаг орныхон, “Есөн туг” клуб, үе тэнгийн бөхчүүдийн төлөөлөл, “Хутагтын хүчтэн” дэвжээний бөхчүүд зэрэг олон хүмүүс хүндэтгэл үзүүллээ.

Маргааш 13:00 цагаас Сүхбаатар аймгийн Сүхбаатар сумын түүхт 100 жилийн ойд зориулсан, тус сумын харьяат, улсын начин Лувсандоржийн Дашдаваагийн нэрэмжит улс, аймгийн алдар цолтой хүчит 128 бөхийн барилдаантай.