Франц, Украины батлан хамгаалахын бүлгүүд түншлэл байгуулахаар төлөвлөж байгааг Францын Батлан хамгаалахын сайд Себастьян Лекорну мэдэгдлээ. Уг түншлэл нь Украины дайны хүчин чармайлтыг дэмжих ба нисгэгчгүй онгоц, сэлбэг хэрэгслийг нийлүүлэх чиглэлд хамтран ажиллана.

"Францын компаниуд Украинд тоног төхөөрөмж үйлдвэрлэх түншлэл байгуулна гэдгийг зарлаж байна. Үүнд, Францын нисгэгчгүй онгоц үйлдвэрлэгч "Delair" болон Франц-Германы байлдааны танк үйлдвэрлэгч "KNDS" компаниуд багтаж байна. Компаниуд хамтран сум үйлдвэрлэх талаар судалж үзнэ. Гэхдээ үүнд багагүй цаг хугацаа шаардагдана. Мөн Франц улс “газар-агаар” ангиллын 200 ширхэг “Астер” пуужинг захиалж, заримыг нь Украин руу илгээхээр болсон" гэж Себастьян Лекорну хэлжээ.

Европын холбоотнуудын зэвсэг, техник нийлүүлэх амлалт удаашралтай байгаа. Түүнчлэн АНУ-ын санхүүжилт дотооддоо улс төрийн маргаан дагуулаад буйд санаа зовж байгаагаа Украины тал мэдэгджээ. Мөн эдгээрээс шалтгаалаад ОХУ-ын арми энэ зун Украины хамгаалалтыг сэтлэх магадлалтай гэж үзэж байна.

Эх сурвалж: BLOOMBERG