WADA буюу Дэлхийн допингийн эсрэг агентлагийн зүгээс Өмнөд Африкийн нийслэл Блумфонтейнд байрлах тус тивийн цор ганц лабораторийн үйл ажиллагааг зогсоохоор болжээ. Тус лаборатори нь олон улсын стандартад үл нийцэх олон удаагийн зөрчил гаргасан учир итгэмжлэлийг нь түдгэлзүүлж, дээрх шийдвэрийг гаргасан аж.

Блумфонтейн дахь допингийн лабораторийн үйл ажиллагааг гуравдугаар сарын 1-нээс эхлэн зургаан сарын хугацаатай түдгэлзүүлэхээр болжээ.

WADA-ийн мэдэгдэлд дурдсанаар “Түдгэлзүүлснээр лабораторид тамирчны биологийн паспортын гематологийн модультай холбоотой шинжилгээг эс тооцвол шээс, цусны дээжийн шинжилгээ зэрэг допингийн эсрэг аливаа үйл ажиллагаа явуулахыг хориглоно" гэжээ. Ингэснээр тус лабораторид хүлээгдэж буй, баталгаажуулах шатанд яваа дээж, шинжилгээний хариу зэргийг WADA-ийн итгэмжлэгдсэн өөр лабораторид шилжүүлэхээр болжээ.

WADA-ийн Африк дахь бүсийн захирал Родни Свигалеер ирэх Африкийн наадмын үеэр допингийн эсрэг хүчтэй аян өрнүүлж, энэ талын асуудлыг үнэлж, хэлэлцэж, шийдвэрлэх арга замыг авч үзнэ гэдгээ илэрхийлэв.