Навальныйн оршуулгад оролцогсдыг царай таних технологи ашиглан баривчлана

ОХУ-ын сөрөг хүчний улстөрч Алексей Навальныйн оршуулгын дараа дор хаяж таван хүн баривчлагдсаныг "OVD-Info" байгууллага мэдээллээ. Түүгээр ч зогсохгүй Кремль үргэлжлүүлэн баривчилгаа явуулахаар төлөвлөж байна.

Жагсаалд оролцож, "Баатруудын ялалтын төлөө" гэж хашгирсан нэг эмэгтэйг Даваа гаригт баривчилсан. Тухайн эмэгтэй бага хэмжээний торгууль төлөөд, маргааш нь суллагдсан болохыг "OVD-Info" мэдээлэв. Оршуулгад оролцсон өөр хоёр хүнийг Мягмар гаригт баривчилсан боловч ямар ял оноосон нь тодорхойгүй байна.

"OVD-Info" байгууллагын хэвлэлийн нарийн бичиг Дмитрий Анисимовын мэдээлснээр Оросын аюулгүй байдлын хүчнийхэн оршуулгад оролцсон хүмүүсийг олж илрүүлэхийн тулд царай таних технологи болон Москвагийн хяналтын системүүдийг ашиглаж байгаа аж. Оршуулах ёслолын өмнөх өдрүүдэд эрх баригчид хэд хэдэн хяналтын камерыг сүм, оршуулах газрын ойролцоо байрлуулжээ.

Навальныйг нас барснаас хойш жагсаал, цуглаан хийсэн 400 гаруй хүн баривчлагдсан. Оршуулах ёслолоос хойш олон зуун хүн эмгэнэлээ илэрхийлэн оршуулгын газрыг зорьсоор байна. Тийм учраас Навальныйн булшин дээр цэцгэн овоо үүссэнийг "Sobesednik" хэвлэлд мэдээлжээ.

Кремлийн хэлмэгдүүлэлтийн кампанит ажил тандалтын технологиос улам бүр хамааралтай болсны нэг жишээ бол энэ. ОХУ-аас Украинд бүрэн хэмжээний түрэмгийлэл эхлүүлсний дараа олон зуун жагсагчийг царай таних технологи болон хяналтын камерын тусламжтай баривчилсан. Угтаа бол гэмт хэрэгтнүүдийг барьж, олон нийтийн аюулгүй байдлыг сахих учиртай технологи өдгөө тэмцэгчдийн эсрэг чиглээд байна.

Эх сурвалж: SEMAFOR