Германы өндөр албан тушаалтнууд Украин дахь үймээний талаар хэлэлцсэн нууц бичлэг ил болжээ. Тус бичлэгт Германы агаарын хүчний офицерүүд үхлийн аюултай "Taurus” зэвсгийн системийг Украинд хүргэж, Крымын хойг Керчийн гүүрийг онилох талаар ярилцсан байна. Оросын төрийн дэмжлэгтэй “RT” сувгийн дарга Маргарита Симонян өөрийн цахим хуудаснаа тус бичлэгийг тавьсан бөгөөд Канцлер Олаф Шольц бичлэг задарсан хэргийг нухацтай шалгах болсноо мэдэгдлээ.
ХБНГУ-ын Батлан хамгаалах яамны хэвлэлийн төлөөлөгч “CNN” агентлагт мэдээлснээр уг бичлэг жинхэнэ болохыг баталсан боловч дунд нь засвар орсон эсэхийг нягтлах боломж олдоогүй байна. Аудио бичлэгт алсын тусгалтай “Taurus” пуужинг Украинд нийлүүлэхэд агаарын хүчний дэмжлэг хэрэгтэйг мөн хэрхэн ашиглах талаар ярилцсан. ОХУ-ын ГХЯ-ны хэвлэлийн төлөөлөгч Мария Захарова өөрийн “Telegram” хуудаснаа Германаас тодорхой хариулт шаардаж буйгаа мэдэгдэж, бичлэг дээрх яриа үнэн эсэхийг тодруулахыг шаардав. Хэрэв Герман асуудлыг цэгцэлж хариу өгөхгүй бол гэм буруутайд тооцож арга хэмжээ авна гэлээ.
Эх сурвалж: CNN
Холбоотой мэдээ