Нийслэлийн хэмжээнд халиа дошин үүссэн 15 байршил байгаа. Үүний зургаан байршил буюу Сүхбаатар, Сонгинохайрхан, Чингэлтэй, Баянзүрх дүүргээс мөсийг нэр сарын хугацаанд зөөвөрлөхөөр болсон. Энэ хүрээнд гуравдугаар сарын 1-ний шөнө 818 рейсээр 15800 тонн мөсийг зөөж, Туул голын сав газарт буулгажээ.

Сүүлийн 15 хоногийн хугацаанд нийт 8251 рейсээр Сэлбэ голын 165, 020 тонн мөсийг тээвэрлээд байгаа аж.

Техник хэрэгслийн хувьд 15 экскаватор, 120 хово, хоёр портер, таван ковштойгоор ажиллаж байна. Нийслэлийн 35 байршилд халиа тошин үүсэж, шар усны үер болох эрсдэл бий болсон тул эхний ээлжид Сэлбэ, Толгойт гол болон Дэнжийн мянга орчмын 10 байршлын 25 км орчим газрын мөсийг зөөж тээвэрлэхээр төлөвлөж буй юм.

Хотын ерөнхий менежер Ц.ТӨРХҮҮ:

-Нийслэлийн хэмжээнд халиа дошин үүссэн 15 байршил бий. Бид машин техникээр мөсийг хагалж авч, тээвэрлэж байгаа. Харин гүүрэнд мөс тулчих вий гэдэг үүднээс гар аргаар ажиллахаас өөр аргагүй. Энэ ажлыг хоёрдугаар сарын 15-наас эхлүүлээд гуравдугаар сарын 15-н гэхэд дуусгана. Дөрөвдүгээр сарын эхээр цаг агаар дулаарч, шар усны үер болох эрсдэлтэй. Мөн Засгийн газраас 62 дугаар тогтоол гарч, тавдугаар сарын 15-н хүртэл өндөржүүлсэн бэлэн байдалд шилжээд буй. Үүнтэй уялдуулж, Улаанбаатар хотын хэмжээнд онцгой байдлын шар түвшинд шилжсэн.

Бидэнд ажил хийхэд хүндрэлтэй, тоног төхөөрөмж дутагдалтай байгаа нь үнэн. Хувийн хэвшлийн байгууллагуудаас 25 аж ахуйн нэгж санал өгснөөс 12 нь техникийн бүрэн байдлыг ханган ажиллаж байна.

Өдрийн цагаар голын мөсийг хагалж, оройн 22.00 цагаас хойш ачааны машинаар зөөж байгаа. Аж ахуйн нэгж байгууллагууд мөс зөөж байгаа рейсээрээ /тээвэрлэлтээрээ/ мөнгө олгоно. Нэг сарын хугацаанд хэдэн удаагийн тээвэрлэлт хийснээрээ тооцож, санхүүжилтийг Гамшгаас хамгаалах хуулийн дагуу олгоно.

Ч.ЭНХЧУЛУУН