Улаанбаатар хотын захирагч Х.Нямбаатар нийтийн тээврээр үйлчилүүлж байж, төлбөрөө төлөхгүй бол иргэнийг 100 мянган төгрөгөөр, хүүхдийг 20 мянган төгрөгөөр торгоно гэдгээ мэдэгдээд буй.

Торгууль тавихаас урьтаж, автобусаар үйлчлүүлж байгаа нийт зорчигчдыг тоолно. Толгой тоолох ажлыг энэ сарын 15-наас эхлүүлэхээ мэдэгдсэн. Нийтийн тээврээр үйлчлүүлж байгаа иргэдийн тоог үнэн зөв гаргахын тулд энэ ажлыг эхлүүлж буй. Ахмад настан, хөгжлийн бэрхшээлтэй иргэн, оюутан, цэрэг, цагдаагийнхан мөн 12 хүртэлх насны хүүхэд автобусаар үнэгүй зорчих эрхтэй. Үүнд зориулж нийслэлээс жил бүр нөхөн олговор хэлбэрээр автобус компаниудад 200 орчим тэрбум төгрөг олгож ирсэн. Энэ хэмжээний нөхөн олговрыг автобус компаниудад олгож байгаа нь хэр бодитой вэ гэдэг тооцоог гаргахад толгой тоолох ажлын нэг зорилго чиглэж буй.

Гэхдээ нийтийн тээврээр үнэгүй зорчих иргэдийн тоо ихэссэний зэрэгцээ бэлнээр төлбөрөө төлөх зорчигчдын тоо ихэссэн нь автобус компаниудын хувьд алдагдалтай ажиллах нэг шалтгаан болсоор байгаа юм. Иймээс толгой тоолж, нийслэлээс нийтийн тээвэрт олгох нөхөн олговрын хэмжээг бодитой тогтоолоо ч иргэд автобусны жолоочид бэлнээр мөнгө өгдөгөө зогсоож, мөн хөнгөлөлт эдлэх эрхгүй иргэн бүр төлбөрөө төлдөг л болохгүй бол зорчигчийг 20.000-100.000 төгрөгөөр торгоод ч байдал дээрдэхүү гэдэг асуудал хөндөгдөж эхлээд байна.

Г.ХОРОЛ