Кремлийг шүүмжлэгч Алексей Навальныйн эцсийн гэрэл зураг

Хуучирсан мэдээ: 2024.03.02-нд нийтлэгдсэн

Кремлийг шүүмжлэгч Алексей Навальныйн эцсийн гэрэл зураг

Кремлийг шүүмжлэгч Алексей Навальныйн эцсийн гэрэл зураг
Relatives and friends pay their last respects at the coffin of Russian opposition leader Alexei Navalny in the Church of the Icon of the Mother of God Soothe My Sorrows, in Moscow, Russia, Friday, March 1, 2024. (AP Photo)

ОХУ-ын сөрөг хүчний улстөрч Алексей Навальныйг 2024 оны гуравдугаар сарын 1-ний Баасан гаригт Москва хотноо оршууллаа. Түүний оршуулах ёслолд ОХУ дахь Франц, АНУ-ын Элчин сайдууд болон бусад дипломатууд хүрэлцэн иржээ.

Шарилыг зөөж ирэх үед гашуудан цугласан олон нэрийг нь дуудан хашгирч, алга ташицгаасан байна. Мөн зарим хүн оршуулгын цувааг дагаж явахыг оролдон, хамгаалалтын саадыг давж гарчээ.

Навальныйн цогцсыг авсанд хэвтүүлж, бүх биеийг нь улаан сарнайгаар бүржээ.

Сүмээс 2.5 км зайд орших Борисовскийн оршуулгын газарт Навальныйг оршоосон юм. Борисовскийн оршуулгын газарт түүний авсыг булшны нүх рүү доошлуулах агшинд Фрэнк Синатрагийн "My Way" дуу эгшиглэжээ.

Оршуулгын газарт очсон хүмүүс аюулгүй байдлын шалгалтад хамрагджээ. Сүмийн эргэн тойронд ч цэрэг хувцастай хамгаалалтын ажилтнууд гаргасан байв. Энэ үеэр дор хаяж нэг хүн баривчилсан гэдгийг Навальныйн багийнхан болон "OVD-Info" хүний эрхийн байгууллага мэдэгджээ. Мөн оршуулгад оролцохоор гэрээсээ гарахыг завдсан 22 хүнийг саатуулсан.

Оршуулах ёслолд хүрэлцэн ирсэн хүмүүст Навальныйн багийнхан талархал илэрхийлэв. "Сүмд болон оршуулгын газарт хүрэлцэн ирсэн хүн бүхэнд баярлалаа. Алексейг дэмжиж, түүний талаар бичсэн бүхэн маш чухал, ирээдүйд улам л чухал болно. Тиймээс үүнийгээ бүү зогсоогоорой. Илүү хүнд цаг мөчүүд, илүү их тэмцэл өмнө хүлээж байна. Аль ч утгаараа бид бууж өгч болохгүй. Энэ талаар ярьсаар, санан дурссаар байх ёстой" гэж Навальныйн хэвлэлийн төлөөлөгч Кира Ярмыш хэллээ.

Түүнчлэн Навальныйн үхэл бол Путины дэглэмийн задралын эхлэлийн цэг гэдгийг түүний ойрын холбоотон Мариа Певчих хэлсэн байна.

Навальныйн эхнэр Юлия Навальная 26 жилийн аз жаргалтай амьдралынхаа төлөө нөхөртөө талархал илэрхийллээ. Гэхдээ тэр оршуулгын ёслолд оролцоогүй юм. Харин Навальныйн эцэг эх хоёр оролцсон.

"Лёша. 26 жил дэндүү аз жаргалтай амьдруулсанд баярлалаа. Сүүлийн гурван жилийн аз жаргалын төлөө ч ялгаагүй баярлаж байна. Хайрласанд чинь, үргэлж намайг дэмжсэнд чинь, шоронгоос хүртэл намайг инээлгэдэг байсанд чинь, намайг үргэлж бодож явдаг байсанд чинь баярлалаа. Чамгүйгээр яаж амьдрахаа мэдэхгүй юм. Гэхдээ тэнгэрт байгаа чамайг баярлуулж, бахархуулахын тулд би хичээнэ. Чадах үгүйгээ мэдэхгүй юм. Гэхдээ хичээнэ ээ" гэж тэр хэлжээ.

Оросын төрийн мэдлийн хэвлэл мэдээллүүд Навальныйн үхлийн талаар хальт дурсаад өнгөрсөн шигээ оршуулах ёслолыг ч бас онцгойлон дурдсангүй. Дэлхий даяар хэвлэлүүд Навальныйн оршуулах ёслолыг бичиж, дамжуулсан ч "Россия 24" телевиз энэ талаар мэдээлсэнгүй. "Тасс" агентлаг л гэхэд "Зөвшөөрөлгүйгээр цуглах нь хууль зөрчсөн үйлдэл" гэх Кремлийн хэвлэлийн төлөөлөгч Дмитрий Песковын анхааруулгыг зөвхөн мэдээлжээ. Гэтэл энэ нь "Тасс"-ын цахим хуудасны хамгийн их уншигдсан хоёр дахь нийтлэл болжээ.

Дэлхийн удирдагчид Навальныйн төлөө гашуудаж, цахим орчинд эмгэнэлээ илэрхийлэв. Тухайлбал, Европын холбооны Гадаад бодлогын тэргүүн Жозеп Боррелл, Их Британийн Гадаад хэргийн сайд Дэвид Камерон, ОХУ дахь Польшийн Элчин сайд Кражевски нар эмгэнэл илэрхийлжээ.

"CNN" агентлаг Алексей Навальныйн оршуулах ёслолын талаарх мэдээллийг дамжуулж, сүүлчийн гэрэл зургийг нь нийтлэхдээ ийн өгүүлжээ: "Бид Навальнйыг амьд ахуйд нь хамгийн сүүлд харахад тэр инээмсэглээд, хошигнож байсан. Харин түүний хамгийн сүүлийн гэрэл зураг авсан дотор байна. Нэгэн цагт улс төр, бие бялдрын хувьд эрч хүчтэй, гал цогтой байсан хүмүүн өдгөө амар амгаланг олжээ."

Эх сурвалж: CNN

Энэ мэдээнд өгөх таны сэтгэгдэл?
26
ХарамсалтайХарамсалтай
2
ЗөвЗөв
1
ХахаХаха
1
ХөөрхөнХөөрхөн
0
ГайхмаарГайхмаар
0
ТэнэглэлТэнэглэл
0
БурууБуруу
Баярлалаа!
NewsMN Гар утасны хувилбар Татах
NEWS.mn

Мэдээллийн эх сурвалж