ОХУ-ын сөрөг хүчний улстөрч Алексей Навальныйг маргааш /2024.03.01/ Москва хотод оршуулна. Түүний эхнэр Юлия Навальная Европын парламентад үг хэлэх үедээ оршуулгын үеэр баривчлагдахаас айж буйгаа илэрхийлжээ.
Навальныйн хуульч Василий Дубков гэх хүнийг нийтийн хэв журам зөрчсөн гэх шалтгаанаар Мягмар гаригт Москвад баривчилсан байна. Дубков нь Навальныйг нас барсны дараа Людмила Навальнаятай хамт Арктикийн шоронг зорьж байв.
Оршуулах ёслолыг зохион байгуулах газрыг хайж байгаагаа Навальныйн хэвлэлийн төлөөлөгч Кира Ярмыш мэдэгдэж байсан. "Бид бараг ихэнх хувийн болон олон нийтийн оршуулгын танхимуудтай холбогдсон. Зарим газар нь сул цаг байхгүй гэнэ. Зарим нь Навальный гэж нэрийг дурсахаас татгалзсан. Бидэнтэй хамтарч ажиллахгүй гэж шууд татгалзсан газар ч байна" гэж Кира Ярмыш хэлсэн байна.
Навальныйг нас барсны дараа Оросын телевизээр түүний тухай ердөө 28 секунд дурдаад өнгөрсөн. Гагцхүү "Собеседник" сонин л Навальныйн инээмсэглэсэн зургийг тэргүүн нүүрэндээ гаргаж, эмгэнэл болон түүний тухай бусад мэдээллийг хоёр хуудас дүүрэн нийтэлжээ. Сонин Москва даяар сонины мухлагуудад тараагдсан боловч удалгүй эргээд хураагдсан аж.
"Собеседник" сонины ерөнхий редактор Олег Ролдугин энэ талаар мэдээлэхдээ "Нэр хүндтэй, хангалттай нөлөө бүхий хүн нас барсан. Тиймээс бид сэтгүүлч хүний хийх ёстой ажлыг л хийсэн. Түүний алдар нэрийг харгалзан үзээд сонины нүүр хуудаст гаргах нь зөв. Сонины бараг бүх хувийг хураан авсан нь ямар ч хууль зүйн үндэслэлгүй. Санхүүгийн хохирлын талаар ямар ч мэдээлэл өгөх боломжгүй байна. Гэхдээ сонин 154 мянга орчим хувь хэвлэгддэг" гэжээ.
1984 онд байгуулагдсан "Собеседник"-ийн цахим хуудас дайн эхлээд удалгүй хаагдсан ч хэвлэмэл сонингоо гаргасаар байна. "Бид Орост улс төр биш сэтгүүл зүйг хөндөж ажилладаг сүүлчийн хэвлэл хэвээр байгаа" гэж Ролдугин мэдэгджээ.
Сонинг хурааж авсан тухай мэдээ тус хэвлэлийн алдар нэрийг өмнөхөөс ч илүү өсгөсөн байна. Редакцийн утсанд нэмэлт хуулбар авахыг хүссэн олон ч дуудлага ирсэн гэв.
Эх сурвалж: REUTERS
Холбоотой мэдээ