Украины ерөнхийлөгч Зеленский Мягмар гаригт Саудын Арабт айлчиллаа. Тэрбээр угсаа залгамжлах хунтайж Мохаммед бин Салмантай Украин дахь дайныг зогсоох, олзны хүмүүсийг Оросоос буцааж авчрах талаар хэлэлцжээ. Мөн зуучлалын үүрэг гүйцэтгэж буй Саудын Арабын хунтайжид талархаж буйгаа Зеленский илэрхийлсэн байна.

Саудын Араб нь ОПЕК+ бүлгийн орнуудаар дамжуулан эрчим хүчний бодлогын хувьд Оростой нягт холбоотой хэвээр байгаа ч Украин дахь дайныг зогсоох зуучлагчийн байр суурьтай байна.

Угсаа залгамжлах хунтайж Мохаммед бин Салман Даваа гаригт ОХУ-ын Төрийн Думын дарга Вячеслав Володинтэй мөн уулзжээ. Тэд парламентын хамтын ажиллагааг идэвхжүүлэх арга зам болон бусад хамтын бүтээн байгуулалтын талаар ярилцсан байна.

Украины зүүн хэсэгт ширүүн тулаан өрнөж, Зеленскийн цэргүүд аажмаар шахагдаж буй үед энэ айлчлал тохиолоо. Одоогоор цэргийн тоо, зэвсэг хангамжийн хувьд давуу талтай байгаа учир Орос санаачлагыг гартаа авсан гэж цэргийн шинжээчид үзэж байна. Шөнөжин үргэлжилсэн ширүүн тулааны улмаас Украины цэргүүд Авдийвка орчмын дахин хоёр тосгоноос ухарчээ.

Эх сурвалж: AL JAZEERA