Ойрын хоёр хоногт ихэнх нутгаар жавартай хүйтэн байна.

2024 оны хоёрдугаар сарын 29-нөөс 2024 оны гуравдугаар сарын 4-нийг хүртэлх цаг агаарын урьдчилсан төлөв:

Хоёрдугаар сарын 29-нд Хэнтийн уулархаг нутаг, Онон, Улз, Хэрлэн голын хөндийгөөр, гуравдугаар сарын 2-нд баруун болон төвийн аймгуудын нутгийн хойд хэсгээр, 3-нд баруун, төв болон зүүн аймгуудын нутгийн зарим газар, говийн аймгуудын нутгийн хойд хэсгээр цас орж, цасан шуурга шуурна.

Салхи ихэнх хугацаанд секундэд 5-10 метр, хоёрдугаар сарын 29-нд говь, талын нутгаар, гуравдугаар сарын 2-нд Алтайн уулархаг нутгаар, 3-нд нутгийн зарим газраар секундэд 12-14 метр хүрч ширүүснэ.

Гуравдугаар сарын 1-нд нутгийн баруун хэсгээр, 2-нд ихэнх нутгаар хүйтний эрч суларч, Увс нуур болон Дархадын хотгор, Завхан голын эх, Идэр, Тэс, Байдраг голын хөндийгөөр шөнөдөө -33…-38 градус, өдөртөө -20…-25 градус, Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Орхон, Хараа, Ерөө, Туул, Тэрэлж, Хэрлэн голын хөндийгөөр -26…-31 градус, өдөртөө -13…-18 градус, говийн бүс нутгийн өмнөд хэсгээр шөнөдөө -9…-14 градус, өдөртөө +3…-2 градус, Их нууруудын хотгор, говийн бүс нутгийн хойд хэсгээр шөнөдөө -14…-19 градус, өдөртөө -3…-8 градус, бусад нутгаар шөнөдөө -18…-23 градус, өдөртөө -8…-13 градус хүйтэн байна. Гуравдугаар сарын 3-нд нутгийн хойд хэсгээр хүйтний эрч бага зэрэг чангарна.