Өнгөрсөн жил БЗС-аас зээл аваад огт төлөөгүй эсвэл дутуу төлсөн хүмүүсийн нэрсийг салбарын яамнаас ил болгосон. Тус зээлэнд хамрагдсан, зээлээ төлөөгүй хүмүүсийн дийлэнх нь улстөрч, төрийн өндөр албан тушаалтнуудын хамаарал бүхий хүмүүс байсан. Зарим улстөрч БЗС-аас авсан зээлээ төлөөгүй нь ил болсон юм.  БЗС-гийн луйвар ил болсноор эргэн төлөлт нь нэмэгджээ.  Тэрчлэн Боловсролын зээлийн сангаас олгосон зээл, тэтгэлгийг шалгах ажлын хэсгээс хэрэг бүртгэлтийн долоо, мөрдөн байцаалтын хоёр хэрэгт мөрдөн шалгах ажиллагаа явуулж байна. Тодруулбал, 1997-2023 онд гадаад улсын их, дээд сургуулийн бакалавр, магистр, докторын  хөтөлбөрт суралцах 3069 хүнд олгосон 230,1 тэрбум төгрөгийн зээл, 941 суралцагчийн 47,1 тэрбум төгрөгийн зээлийг чөлөөлсөн үндэслэлийг нэг бүрчлэн шалгаж байна.

Энэ хүрээнд 2288 суралцагчийн хувийн хэрэг, материалтай танилцаж, 1600 гаруй хүнээс гэрчийн мэдүүлэг авч, 1494 суралцагчийн хувийн хэргээс 2500 орчим зөрчлийг илрүүлжээ.

Шалтгалтаар улс төр, урлаг соёлын зэрэг нөлөө бүхий хүмүүстэй хамааралтай 364, үүнээс зөрчилтэй 262 суралцагч байгаа болохыг тогтоосон байна. Ажлын хэсэг байгуулагдсанаас хойш мөрдөн шалгах ажиллагааны явцад нийт 220 суралцагчийн 1,2 сая ам.доллар буюу 4,2 тэрбум орчим төгрөгийн зээл эргэн төлөгджээ.