Монголд допингийн эсрэг тэмцэхэд ганц "гай" болж байгаа байгууллага нь өнөөх МОНАДА буюу Монголын үндэсний допингийн эсрэг байгууллага. Угтаа допингийн эсрэг тэмцэж, суртал ухуулга явуулах ёстой ч байгуулагдсан цагаасаа допингийг хөхүүлэн дэмжиж, олигтой ажил хийгээгүй гэж хэлж болох. Жилийн өмнө л шинэ тэргүүнтэй болж, Монголыг Парисын олимпоос хасагдах аюулаас аварч чадсан ч хууль зөрчсөн нь тодорхой болж, улсын бүртгэлээс Монголын үндэсний допингийн эсрэг байгууллага хасагджээ.

2024 оны хоёрдугаар сарын 22-ны өдөр Монголын үндэсний допингийн эсрэг байгууллагын хуучин нэр болох Допингийн эсрэг төв гэх нэр нь сэргэжээ. Учир нь 2017 онд байгуулагдсан байгууллагыг хүчингүйд тооцож, 2007 оны байгууллагыг эргэн сэргээсэн гэнэ.

Мөн удирдах зөвлөлийн дарга гэх хуучин тэргүүн Ж.Хатанбаатар, шинэ тэргүүн Ц.Уугангэрэл нарыг хасчээ. Ингээд МОНАДА улсын бүртгэлээс хасагдав. Хамгийн сонирхолтой нь улсын бүртгэлээс хасагдсан байгууллага өнөөдөр/2024.02.27/ удирдах зөвлөлийн хурлаа зарласан аж.

Эцсийн өмчлөгч, хувь эзэмшигч, удирдах албан тушаалтангүй болсон, бүртгэлгүй, чадамжгүй МОНАДА хурал зарласан нь тун хачирхалтай. Улсын бүртгэлд бүртгэлгүй байгууллага хурал зарлах эрхгүйгээс гадна тус хуралд оролцох гишүүд нь хууль бус, хэлэлцэх асуудал нь хууль бус, гарсан шийдвэр нь мөн л хууль бус болж таарна.

ЯАГААД МОНАДА ХУУЛЬ БУС БОЛЖ, УЛСЫН БҮРТГЭЛЭЭС ХАСАГДСАН БЭ? 

Энэ бүхэн өнөөх л Ж.Хатанбаатартай холбоотой. Тэрбээр 2017 онд Монголын үндэсний допингийн эсрэг байгууллагыг үүсгэн байгуулахдаа өмнөх гишүүдийн гарын үсгийг хуурамчаар үйлдэн хасч шинээр бичиг баримт бүрдүүлсэн нь улсын бүртгэлтийн хяналтын байцаагчийн дүгнэлтээр илэрч ийнхүү зохих шийтгэлээ хүлээжээ.

Улсын бүртгэлээс нэгэнт хасагдсан тул одоо допингийн эсрэг ажиллагааг Монгол Улсад зохион байгуулах, түүнийг төлөөлөх эрхгүй.

WADA буюу Дэлхийн допингийн эсрэг агентлагийн дүрэмд допингийн эсрэг байгууллага нь тухайн улсын үндэсний олимпийн хорооны байгуулсан байгууллага байна гэж заасан хэрэг. Өөрөөр хэлбэл, хувь хүн тус байгууллагыг үүсгэн байгуулах, өмчлөх эрхгүй.

Анхнаасаа хууль зөрчсөн байтал Ц.Уугангэрэлийг өнгөрсөн жил шинэ тэргүүнээр сонгож, Ж.Хатанбаатар өөрийгөө хүндэт ерөнхийлөгч болгосон гэх. Анхнаасаа буруу суурин дээр өөрчлөн шинэчлэгдсэн учир бүхэлд нь хүчингүй болгохоос өөр аргагүйд хүрэв.

Ийнхүү 2017 оны Монголын үндэсний допингийн эсрэг байгууллага хүчингүй болж, албан шийдвэр гарснаар 2007 онд байгуулагдсан Допингийн эсрэг төв гэдэг нэр, түүний удирдах бүрэлдэхүүний эрх автоматаар сэргэж байгаа аж.

МОНАДА-ийн нэрийг Допингийн эсрэг төв болгон хуучин бүрэлдэхүүнийг нь сэргээсэн.

МОНАДА-Г ӨӨРЧЛӨН ШИНЭЧЛЭХ ЯМАР ГАРЦ БАЙГАА ВЭ?

Дэлхийн допингийн эсрэг дүрэмд үндэсний допингийн эсрэг байгууллага нь холбогдох хууль тогтоомжид өөрөөр заагаагүй бол үндэсний олимпийн хороо нь өөрөө байж болно эсвэл түүний байгуулсан ТББ байж болно. Дэлхийн допингийн эсрэг агентлагийн бүтцэд нь өвлийн спортын холбоод, зуны спортын холбоод, олон улсын олимпийн болон паралимпийн хороо, тамирчдын комиссоос тус тус төлөөлөл байдаг. Сонирхол нь допинг дээр нэгдэж, эрх ашгаа хамгаалах үүднээс тал бүрийн төлөөллийг багтаадаг.

Одоо 2007 оны Допингийн эсрэг төвийн хуучин, эрх нь сэргэсэн бүрэлдэхүүн хурлаа хийж, өөрчлөлт хийх хэрэгтэй.

Эсвэл Засгийн газрын зүгээс олимпийн хороо, паралимпийн хороо, спорт холбоодыг цуглуулж, удирдах зөвлөлийг нь шинээр бүрдүүлэх нь илүү тохиромжтой хувилбар.