Хятадын зүүн хэсгийн Нанжин хотод Баасан гаригийн өглөө 04:40 цагийн үед орон сууцны байшин шатсаны улмаас 15 хүн амиа алдаж, 44 хүн шархаджээ. Шархадсан хүмүүсийн нэгнийх нь биеийн байдал хүнд байгаа аж.

Энэхүү барилга нь Шанхай хотоос баруун хойд зүгт 260 км зайд орших Нанжин хотын Юхуатай дүүрэгт байрладаг.

Албаныхны таамаглаж буйгаар цахилгаан дугуйнууд байрлуулсан байсан нэгдүгээр давхраас эхлэн гал гарчээ. Галын тодорхой шалтгааныг мөрдөн шалгасан хэвээр байна.

Гал унтраах ажиллагаанд 25 гал унтраах машин, 130 гал сөнөөгч оролцжээ. Галыг 06:00 гэхэд бүрэн унтрааж дууссан бол, эрэн хайх, аврах ажиллагаа 14:00 цагийн орчимд дууссан байна.

Нанжин хотын дарга Чен Жичан хэвлэлийн бага хурлын үеэр хохирогчдын ар гэрийнхэнд эмгэнэл илэрхийлж, уучлалт гуйжээ.

Эх сурвалж: BBC