Улсын онцгой комиссын шийдвэрээр өвөлжилт, хаваржилт хүндэрсэн аймгуудад Засгийн газрын гишүүдээр ахлуулсан шуурхай 6 бүлэг ажиллахаар замдаа гараад байна.  Нийт нутгаар өвөлжилт, хаваржилт хүндэрч байгаатай холбогдуулан зудын эрсдэлийг бууруулахад чиглэсэн бүх талын арга хэмжээг авч, хэрэгжүүлэх үүднээс өвөлжилт нэн хүнд байгаа аймаг, сумдын малчдад шаардлагатай өвс, тэжээл, байгалийн гамшигт үзэгдлийн үед эрэн хайх, аврах ажиллагааг шуурхай зохион байгуулахад шаардлагатай автомашин, түлш шатахуун, отор нүүдлээр явж буй малчдад хоол хүнс, эрүүл мэндийн тусламж үйлчилгээг шуурхай үзүүлэх, орон нутгийн цасанд боогдсон зам давааг чөлөөлөх зэрэг ажлуудыг хийх юм.

Дэлгэрэнгүйг энд дарж уншина уу.

ЖҮЖИГЧИН Д.БАТТӨМӨРИЙН КИНО "АЛТАН ШАР ШУВУУ" ХҮРТЖЭЭ

Ард түмэн түүнийг “Банш Батаа” хэмээн хошин урлагийн тайзнаа бүтээсэн дүрээр нь нэрлэх нь бий. Монгол Улсын Гавьяат жүжигчин цол тэмдгээр энгэрээ мялаасан уран бүтээлч Д.Баттөмөрийн найруулсан "Трио” уран сайхны кино Бразил улсын Балнеариогийн олон улсын кино наадмын шилдэг киногоор шалгарч, "Алтан шар шувуу" цомын эзэн болжээ.

"Трио" уран сайхны кино 2023 оны хоёрдугаар сарын 24-нд Монгол дахь нээлтээ хийсэн.

Уран сайхны кинонд дауны хам шинжтэй хүүгээ ээж нь сумын сургуульд сургахаар ирэх боловч түүнийг харагдах байдлаас нь болж, бусад эцэг эх, сурагчид гадуурхана. Тиймээс ээж нь хүүгээ аваад ганц гэрээрээ бууж, айл амьтнаас тусдаа амьдардаг. Ээж нь хүүгээ сайхан сэтгэлтэй, сүсэг бишрэлтэй, хэний ч гар харахааргүй хүн болгон өсгөнө. Дауны хам шинжтэй хүү эрийн цээнд хүрч, нэг л өдөр жам ёсны хагацал үзэж буй талаар өгүүлнэ.

Сонирхуулахад, Төрийн соёрхолт Зундуйн Хангал агсны "Бодол" аязыг уг киноны дуу болгож, дуучин Самандын Жавхлан дуулсан юм. Хөгжмийн найруулгыг Урлагийн гавьяат зүтгэлтэн Д.Түвшинсайхан хийсэн байна. Дууны хоолойг алдарт “The Beatles” хамтлаг бичлэгт ордог байсан “London Abbey road studio”-д хийжээ.

НОГООН АВТОБУСНЫ ХЭРЭГТ ЯЛЛАХ ДҮГНЭЛТ ҮЙЛДЖЭЭ

Түгжрэлийг бууруулах арга хэмжээний хүрээнд төсвийн хөрөнгөөр автобус худалдан авах ажиллагаатай холбоотой хэргийг шалгах ажлын хэсгээс гурван хэрэгт мөрдөн шалгах ажиллагаа явуулж, нэг хэргийг шүүхэд шилжүүлэхээр шийдвэрлэжээ.

Тодруулбал, нийслэлийн Засаг даргын Тамгын газар болон Худалдан авах ажиллагааны газрын эрх бүхий албан тушаалтнууд 2023 онд нийслэлийн өмчийн хөрөнгөөр 600 ширхэг автобус худалдан авах ажиллагааг зохион байгуулахдаа хууль зөрчиж, бусдад давуу байдал бий болгосон гэх хэрэгт Эрүүгийн хуулийн 22.1 дүгээр зүйлийн 1, 3 /Эрх мэдэл, албан тушаалын байдлаа урвуулан ашиглах/, 17.3 дугаар зүйлийн 2.2 /Залилах/, 22.12 дугаар зүйлийн 1 /Хуулийн этгээдийн эрх мэдлийг урвуулан ашиглах/-д зааснаар яллах дүгнэлт үйлдэж, яллагдагч нарын гомдол гаргах, шийдвэртэй танилцах эрхийг хангаж ажиллаж байна.

Хэрэгт УИХ-ын гишүүн, Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны дарга Ж.Сүхбаатар, нийслэлийн Засаг даргын ахлах зөвлөх Д.М, Худалдан авах ажиллагааны газрын Мэдээллийн технологийн хэлтсийн дарга Б.Т, Нийтийн тээврийн газрын дарга С.Ж нарын албан тушаалтнууд, Том оврын автобусны үйлчилгээ эрхлэгчдийн холбоо, “Тэнүүн-Огоо” ХХК-ийн албан тушаалтнууд болон БНСУ-ын хоёр иргэн, нийт 24 хүн яллагдагчаар татагджээ.

Дэлгэрэнгүйг энд дарж уншина уу.

НҮҮРСНИЙ ХЭРГЭЭР 66 ХҮНД ЯЛ ОНООЖЭЭ

Нүүрс олборлолт, экспорт, тээвэрлэлт, худалдан авах ажиллагаатай холбоотой хэргийг шалгах ажлын хэсгээс нийт 84 хэрэгт мөрдөн шалгах ажиллагаа явуулж, 13 улс төрд нөлөө бүхий этгээд, 90 нийтийн албан тушаалтан, 53 иргэн, нийт 156 хүн, гурван хуулийн этгээдийг яллагдагчаар татан шалгажээ. Үүнээс 96 хүн, хоёр хуулийн этгээдэд холбогдох эрх мэдэл албан тушаалын байдлаа урвуулан ашигласан, хахууль авсан, хахууль өгсөн, үндэслэлгүйгээр хөрөнгөжсөн, мөнгө угаасан зэрэг 12 хэргийг яллах дүгнэлт үйлдэн шүүхэд шилжүүлснээс найман хэргийг анхан шатны шүүх хянан хэлэлцэж, шийдвэрлэсэн байна.

Мөн шүүгдэгч нарын нийтийн албанд томилогдох эрхийг 2-7 жилийн хугацаагаар хасч, гэмт хэрэг үйлдэж олсон хөрөнгө, орлого болох автомашин, усан онгоц, үл хөдлөх хөрөнгө, бэлэн мөнгө зэргийг хураахаар шийдвэрлэсэн байна. Тухайлбал, "Эрдэнэс тавантолгой" ХК-ийн гүйцэтгэх захирал Б.Ганхуягаас хахууль авах гэмт хэргийн улмаас бий болсон болон үндэслэлгүйгээр хөрөнгөжсөн 9,9 тэрбум төгрөгийг, УИХ-ын гишүүн Т.Аюурсайханаас үндэслэлгүйгээр хөрөнгөжсөн 1,8 тэрбум төгрөгийг тус тус гаргуулж, улсын орлого болгохоор болжээ.

Дэлгэрэнгүйг энд дарж уншина уу.

СЭЛБЭ ГОЛООС 21.340 ТОНН МӨСИЙГ ЗӨӨЖ, ТЭЭВЭРЛЭЭД БАЙНА

Нийслэлийн хэмжээнд халиа дошин үүссэн 15 байршил байна. Үүний зургаан байршлаас буюу Сүхбаатар, Сонгинохайрхан, Чингэлтэй, Баянзүрх дүүргээс мөсийг нэр сарын хугацаанд зөөвөрлөнө. Баасан гаригийн байдлаар 21.340 тонн мөсийг Сэлбэ голоос зөөж, тээвэрлээд байна. Нийслэлчүүдийг шар усны үерээс урьдчилан сэргийлэх энэ ажилд машин техникээс гадна цөөн тооны ажилчид улаан гараараа мөс хагалж буй юм.

Фото сурвалжлагыг энд дарж үзнэ үү.