Засгийн газрын хэрэг эрхлэх газрын дарга Д.Амарбаясгалан ч 2023 оны сүүлээр хийсэн мэдэгдэлдээ "2024 оны Парисын олимпод манай улс цагаан тугийн дор оролцох эрсдэлээс гарлаа. Энэ оны есдүгээр сарын 22-нд дэлхийн допингийн эсрэг байгууллагын гүйцэтгэх хорооны хурлаас Монголын үндэсний допингийн эсрэг байгууллагад тавьсан шаардлагуудыг биелүүлэх дөрвөн сарын хугацаа өгсөн. Тэгвэл Засгийн газраас ажлын хэсэг гарч Монголын үндэсний допингийн эсрэг байгууллагын удирдлага, үйл ажиллагаанд тулгарч байсан асуудлуудыг шуурхай шийдвэрлэж ажилласны үр дүнд шаардлагуудыг гурван сарын хугацаанд бүрэн биелүүллээ. Тус байгууллагын удирдах зөвлөлийн бүрэлдэхүүн таван хүнээс бүрддэг байсныг олон талын төлөөлөл бүхий 13 хүнтэй болгож өргөжүүлсэн нь допингийн эсрэг үйл ажиллагаа ил тод байх боломжийг бүрдүүлж байна. Өөрөөр хэлбэл удирдах зөвлөл нэрийн дор тулгамдсан асуудлуудыг бугшруулах, олимпод цагаан тугийн дор Монголын тамирчид оролцох эрсдэлтэй болох зэрэг ноцтой үр дагавруудыг дахин гаргахгүй байхад чухал нөлөөтэй. Ийнхүү ирэх Парисын олимпын наадамд Монгол Улс төрийн далбаан дороо оролцож, тамирчид хурд, хүч, чадвараа сорих болно" гэж байв.

WADA-ийн CRC-ийн зүгээс Нигери, Венесуэлийн үндэсний допингийн эсрэг байгууллагуудыг WADA-ийн кодыг дагаж мөрдөөгүй гэж буруутгаж байгаа аж. Нигерийн үндэсний допинийн эсрэг байгууллага 2022 оны төгсгөлд баталсан допингийн эсрэг хөтөлбөртөө хэд хэдэн чухал шаардлагуудыг тусгаагүй байсан бол Венесуэлийнх чухал шаардлагуудыг биелүүлээгүй гэнэ. Улмаар Нигери, Венесуэлийн допингийн эсрэг байгууллагууд санал нийлэхгүй байгаагаа мэдэгдэж, дээрх хоёр хэрэг хоёрдугаар сарын 9-ний өдөр Спортын арбитрын шүүх рүү шилжжээ.

Мөн Анголын үндэсний олимпийн хороо нь дэлхийн допингийн эсрэг кодын 2021 оны шинэчилсэн хувилбарыг өөрийн улсын хууль дүрмэндээ нийцүүлээгүй асуудал үүссэн бол Филиппиний үндэсний допингийн эсрэг агентлаг өмнөх ноцтой зөрчлүүдээ шийдвэрлээгүй байгаа гэв.

Анголын үндэсний олимпийн хороо нь давхар үндэсний допингийн эсрэг агентлагийнхаа үүргийг гүйцэтгэдэг.

Ийнхүү дөрвөн сарын хугацаанд алдаагаа засч сайжруулаагүй Анголын үндэсний олимпийн хороо дараах шийтгэлийг хүртжээ. Тухайлбал, WADA-ийн ямар ч зөвлөл, хорооны гишүүнээр элсэхгүй, тус улсад WADA-ийн ямар ч арга хэмжээ зохион байгуулагдахгүй, WADA-ийн хөтөлбөрт хамрагдахгүй, WADA-аас санхүүгийн дэмжлэг авахгүй гэсэн шийтгэлийг тус улсад хүртээжээ. Мөн Анголын үндэсний олимпийн хороог гишүүнчлэлээ сэргээх хүртэл спортын томоохон арга хэмжээ зохион байгуулах эрхийг нь хязгаарлаж, баг тамирчдыг нь олон улсын тэмцээнд оролцвол туг, далбаа, төрийн дууллаа ашиглах эрхгүй болгов. Харин Филиппинийн зүгээс эсэргүүцэж байгаагаа мэдэгдэж, хэрэг нь спортын арбитрын шүүх рүү шилжжээ.

Ерөнхийдөө Монголын хүртэх эрсдэлтэй байсан шийтгэлийг Ангол хүртлээ.