Оросын "Цезарь Куников" хөлөг онгоц Крымийн эрэгт живснийг Украин мэдэгдлээ. Хөлөг онгоцыг Ялта хотын өмнөд хэсэгт цохилтод өртсөн гэж таамаглаж байна. Орон нутгийн хэвлэлд мэдээлж буйгаар Лхагва гаригийн өглөө хүчтэй дэлбэрэх чимээ сонсогджээ. Хөлөг онгоц руу далайн нисгэгчгүй онгоц "Магура V5"-аар дайрсан гэж Украины Тагнуулын газар мэдээллээ.

Украины арми Крым дахь Оросын Хар тэнгисийн флот руу удаа дараа цохилт өгсөн. Хиймэл дагуулаас авсан зургийг харахад флотын ихэнх хэсэг нь хойгийг орхиж, Хар тэнгисийн Новороссийск боомт руу явжээ.

ОХУ-ын Украин дахь дайн ирэх долоо хоногт гурав дахь жилдээ орох гэж байна. Украины Зэвсэгт хүчний шинэ командлагч Александр Сирський нөхцөл байдал маш төвөгтэй, хурцадмал байгааг хүлээн зөвшөөрчээ. Дөнгөж өнгөрсөн долоо хоногт албанд томилогдсон тэрбээр Лхагва гаригт фронтын шугамд очиж, нөхцөл байдалтай танилцсан байна. Дайсныг нутаг дэвсгэрийн гүн рүү оруулахгүйн тулд чадах бүхнээ хийж байна гэдгийг мөн Сирський хэлжээ.

"Цезарь Куников" нь ЗХУ-ын үеийн төгсгөлд бий болсон онгоц юм. Хэрэв "Цезарь Куников" үнэхээр живсэн бол энэ сард Хар тэнгист хийсэн Украины хоёр дахь амжилттай цохилт болно. Эхнийх нь хоёр долоо хоногийн өмнөх "Ивановец" нэртэй байлдааны жижиг хөлөг онгоцны сүйрэл юм. Харин өнгөрсөн оны арванхоёрдугаар сард "Новочеркасск" нэртэй хөлөг онгоц Феодосия боомтод осолджээ.

Эх сурвалж: BBC