Гэгээн Валентины өдрийг баглаа цэцэг, шоколадгүйгээр төсөөлөх аргагүй. Гэвч энэ жил какао, элсэн чихрийн үнээс шалтгаалаад шоколадны үнэ урьд хожид байгаагүйгээр өсчээ. Тодруулбал, өнгөрсөн долоо хоногт Гана болон Зааны ясан эрэгт цаг агаар муудсанаар ургацын хэмжээ эрс багасч, какаоны үнэ түүхэн дээд хэмжээнд хүрэв.

Зааны ясан эрэг буюу баруун Африкт орших Кот д’Ивуар болон Гана улсууд нь дэлхийн какао үйлдвэрлэлийн 60 хувийг эзэлдэг.

"S&P Global"-ын какао, чихрийн зах зээлийн судалгааны ерөнхий шинжээч Сергей Четвертаковын хэлснээр какаоны нийлүүлэлт гурав дахь жилдээ хангалтгүй байгаа аж. Мөн ойрын ирээдүйд сайжрах төлөвгүй байгаа гэлээ.

Какаоны фьючерс оны эхэн үеэс бараг 40 хувиар өсч, Пүрэв гаригийн байдлаар нэг тонн нь 5874 ам.долларт хүрсэн байна. Энэ нь бүх цаг үеийн дээд үзүүлэлт юм. Үүнд нөлөөлж байгаа гол хүчин зүйл нь Эль-Нино нэрт цаг агаарын үзэгдэл ажээ. Эль-Ниногийн цаг агаарын үзэгдэл Зүүн өмнөд Ази, Энэтхэг болон Африкийн зарим хэсэгт хуурай температурыг авчирсан. Үүний улмаас өнгөрсөн жил ч бас элсэн чихэр, какаоны үнэ өссөн байна.

"NielsenIQ" мэдээллийн сангийн цуглуулсан мэдээллээс харвал шоколадны үнэ өнгөрсөн онд 11 хувиар өсчээ.

Гэсэн хэдий ч Валентины өдөрт зориулсан шоколадны худалдан авалт буурахгүй гэж шинжээчид үзэж байна. Судалгаанд хамрагдсан америкчуудын 92 хувь нь энэ жил Гэгээн Валентины өдрөөр шоколад худалдаж авахаар төлөвлөж байна гэжээ. Европ, Хойд Америкийн зах зээлд шоколадны худалдан авалт өндөр хэвээр байгаа бол Азид эрэлт хэрэгцээ нь эрс багассан байна.

Нөгөөтэйгүүр, Гэгээн Валентины өдөртэй хамааралгүйгээр эдийн засгийн хямралтай үед ч шоколадны эрэлт харьцангуй тогтвортой байсныг хүнсний барааны үнийн мэдээллийн "Mintec" байгууллага мэдээлжээ. Энэ нь сэтгэлийн таашаал авах гэсэн хүний төрөлх араншинтай холбоотой байдаг гэв.

Эх сурвалж: CNBC